00:00:00 IGIHE NETWORK KN KINYARWANDA EN ENGLISH FR FRANCAIS

Uko umuhango wo kwimika Musenyeri Musengamana Papias wa Diyosezi ya Byumba wagenze (Amafoto)

Yanditswe na Akayezu Jean de Dieu, Cyprien Niyomwungeri
Kuya 14 May 2022 saa 10:48
Yasuwe :

Umuhango wo kwimika Musenyeri Musengamana Papias wabaye kuri uyu wa Gatandatu tariki 14 Gicurasi 2022, muri Stade ya Byumba witabirwa na Minisitiri w’Intebe w’u Rwanda, Dr Ngirente Edouard wari uhagarariye Umukuru w’Igihugu.

Ni ibirori binogeye ijisho byitabiriwe n’abayobozi muri Guverinoma y’u Rwanda barimo Minisitiri w’Ubutegetsi bw’Igihugu, Gatabazi Jean Marie Vianney, Minisitiri w’Uburezi, Dr Uwamariya Valentine, Minisitiri w’Umutekano mu Gihugu, Gasana Alfred na Minisitiri wa Siporo, Munyagaju Aurore Mimosa.

Hari kandi abandi bayobozi mu nzego za Leta barimo Umuyobozi Mukuru w’Urwego rw’Imiyoborere, Dr Usta Kayitesi, ubuyobozi bw’Intara y’Amajyaruguru, inzego z’Ingabo na Polisi n’abandi.

Ibihigu by’ibituranyi nk’u Burundi, Repubulika Iharanira Demukarasi ya Congo byari bihagarariwe ndetse hari n’abashyitsi baturutse i Roma mu Butaliyani, mu Buyapani n’ahandi hirya no hino ku Isi.

UKO UMUHANGO WO KWIMIKA MUSENYERI MUSENGAMANA WAGEZE:

Saa 3:30 Minisitiri w’Intebe Dr Ngirente yashimiye Mgr Nzakamwita, yifuriza ishya n’ihirwe Mgr Musengamana watorewe kuba Umushumba wa Byumba, Ati "Icyizere wagiriwe na nyiricyubahiro Papa Francis, ni ikimenyetso cy’ubushobozi yakubonyemo, bikwiye kukongerera imbaraga mu nshingano wahawe".

Minisitiri w'intebe Dr Ngirente yijeje Musenyeri mushya ubufatanye bwa Leta y'u Rwanda

Dr Ngirente yashimiye Mgr Nzakamwita uburyo yayoboye diyosezi ya Byumba mu myaka 26 ishize mu burezi, bamwitaga Musenyeri w’abajene, wabatezaga imbere kuko yemera ko urubyiruko ari ejo hazaza. Yagize uruhare mu rwego rw’ubuzima, kubaka umuryango, isanamitima n’ibindi.

Yatanze umukoro wo gukomeza kwita ku rubyiruko, abana bagwingira, abana bari mu muhanda, abana banywa ibiyobyabwenge n’uburezi muri rusange.

Yabwiye abaturage ati "Nagirango mbasabe gukomeza mukorera igihugu cyanyu, mufasha Musenyeri mushya, ari ko tugana ku majyambere y’igihugu duhereye cyane kuri iyi ntara murimo, iyi diyosezi murimo mu bikorwa bijyanye n’ubuhinzi, ubworozi, uburezi, kurwanya igwingira ry’abana, kurwanya ibiyobyabwenge, byose mureke tubikorane nk’abakristu kugira iyi diyosezi ikomeze ibe intangarugero".

3:20: Musenyeri Musengamana yashimiye abitabiriye ibirori bye

Musenyeri Musengamana yashimiye Imana n’Umushumba wa Kiliziya Gatolika ku Isi, Papa Francis wamuhaye izi nshingano zo kuba Umwepiskopi wa Diyosezi ya Byumba. Yanashimiye abantu bose baje kumushyigikira kuri uyu munsi w’ibyishimo.

Yashimiye Musenyeri Nzakamwita avuga ko yakoze inshingano ze neza kandi akazikora mu bihe bitoroshye u Rwanda na Kiliziya Gatolika yari irimo nyuma ya Jenoside yakorewe Abatutsi.

Musenyeri Musengamana kandi yanashimye Abakristu ba Diyosezi ya Byumba n’Abasaseridoti abizeza kuzabakunda, agakorana nabo kandi akajya abasabira ku Mana.

Ati “Muzansabire ariko nanjye nzabasabira uko Imana izabinshoboza kandi ndizera ko icyo nzayisaba itazakinyima kandi namwe icyo muzayisaba ntabwo izakibima. Bikira Mariya Umubyeyi ugira inama nziza na Matiyasi Mutagatifu duhimbaza none mudusabire.”

3:00: Musenyeri Nzakamwita yahaye ikaze ugiye kumukorera mu ngata!

Musenyeri Nzakamwita Servilien w’imyaka 79, yahawe umwanya ngo ageze ijambo ku bitabiriye ibi birori by’akataraboneka byo kumusezerera nk’umuntu ugiye mu kiruhuko cy’izabukuru ndetse no kwimika ugiye kumukorera mu ngata, Musenyeri Musengamana Papias.

Ati “Turashimira Imana yanaduhaye umucyo, Imana iduhaye umushumba mushya, ubaye Umwepiskopi wa Gatatu wa Diyosezi Gatolika ya Byumba muri iyi myaka 41 imaze ishinzwe.”

Ati “Uzabe umushumba mwiza, utarumanza, witangira izo Imana ikuragije, izo Kiliziya Gatolika igushinze, humura ariko ufite abapadiri bahagije hafi 150, njye natangiranye batatu gusa.”

“Ufite Abihayimana bagera ku 170, abaseminari bato n’abakuru 450, abo bose barakwishimiye kandi biteguye kukuba hafi no kugufasha. Iyi Diyosezi ya Byumba uhawe kuyobora ni ngari, ikorera mu Turere dutanu, ifite abakristu hafi ibihumbi 800. Abo bakristu bose baragukunda kandi biyemeje kugufasha.”

Musenyeri Nzakamwita yamusezeranyije ubufatanye n’isengesho rihoraho.

Yaboneyeho gusezera ku bakristu ba Byumba abashimira uburyo bamubaye hafi mu nshingano kandi mu bihe bitari byoroshye.

Ati “Ikenurabushyo ryari rigamije isanamitima, ubwiyunge no gufasha abatishoboye cyane cyane imfubyi, abapfakazi n’abacitse ku icumu rya Jenoside yakorewe Abatutsi.”

Musenyeri Nzakamwita yavuze ko mubyo asize bitarakorwa uko abyifuza harimo umushinga wo kubaka ‘Centre Imbabazi’, ikigo cy’amahugurwa, imikino n’ibindi bikorwa bigamije ubumwe n’ubwiyunge.

Ati “Mbabajwe n’uko nsize uwo mushinga ukiri mu ntangiriro, ariko ndizera ko mwese muzafasha Musenyeri Musengamana nsigiye iki kivu kugikomeza no kuzacyusa.”

Musenyeri Nzakamwita yashimiye Perezida wa Repubulika y’u Rwanda, Paul Kagame , avuga ko yamwitabaje kugira ngo abashe kwesa umuhigo yari yarihaye wo gusigira Diyosezi ya Byumba, ishuri rigezweho.

Kuri ubu imirimo yo kubaka iryo shuri igiye kurangira ndetse Musenyeri Nzakamwita yavuze ko mu gihe cya vuba azatumira abayobozi bakaza kuritaha.

Mgr Nzakamwita yashimiwe umuhate n'ubwitange yagaragaje ubwo yari ayoboye Diyosezi ya Byumba
Musenyeri Nzakamwita yashimye Imana yamufashije mu myaka 26 yose yari amaze ayoboye Diyosezi ya Byumba

Saa 2:50: Musenyeri Musengamana yahawe ikaze mu Nama y’Abepiskopi mu Rwanda, Musenyeri Nzakamwita avugwa ibigwi byamuranze mu nshingano ze nk’uwari umaze igihe kirekire ari Umwepiskopi wa Diyosezi ya Byumba.

Musenyeri Rukamba yacyeje Mgr Nzakamwita ku mirimo ikomeye yakoreye diyosezi ya Byumba

Perezida w’Inama y’Abepiskopi mu Rwanda, Musenyeri Rukamba Philippe yashimiye Perezida Kagame wohereje intumwa [Minisitiri w’Intebe Dr Ngirente Edouard] imuhagararira muri ibi birori byo kwimika Musenyeri Musengamana.

Musenyeri Rukamba yashimiye Musenyeri Musengamana wakiriye ugushaka kw’Imana yamuhaye ubutumwa bwo kuyobora intama zo muri Diyosezi ya Byumba.

Ati “Ishyaka usanganywe, biduha icyizere ko muzasoza neza ubutumwa Imana ibashinzwe.”

Musenyeri Rukamba yasabye Abapadiri ba za Paruwasi zibarizwa muri Diyosezi ya Byumba guha ikaze Umushumba wabo kandi bakamuyoboka ari nako bamufasha mu rugendo n’inshingano yatorewe zo kuyobora intama mu nzira igana ijuru.

Ati “Nguyu umushumba Imana yabahitiyemo kugira ngo mufatanye inzira igana ijuru. Muramwakirane ubwuzu n’umutima w’urukundo kugira ngo hamwe nawe mwubake Kiliziya.”

Musenyeri Rukamba yashimiye Musenyeri Nzakamwita ugiye mu kiruhuko cy’izabukuru avuga ko yaranzwe n’umuhate, ubwitange ndetse n’urukundo.

Ati “Ijambo rye ryiza rihumuriza benshi rigakesha imitima yabo, aho yabaye hose yabaye Umusaseridoti ukundwa kuko yitangaga, yabaye Umushumba mwiza wa Kabiri wa Doyosezi ya Byumba nyuma ya Musenyeri Ruzindana Joseph.”

Yavuze ko Musenyeri Nzakamwita yasuraga imiryango remezo ndetse akagera no mu ngo aho yitaye cyane ku ikenurabushyo ry’ingo. Yanamushimiye kuba yarakoresheje imbaraga nyinshi mu kongera kubaka iyi Diyosezi nyuma y’ibihe bikomeye bya Jenoside yakorewe Abatutsi.

Ati “Turagushima kubera uwo wabaye we muri twe, kubera ibyo twakoranye byose, mu gukunda no gukorana n’urubyiruko urwereka ibyo rukwiye gukora kandi rurangwa n’ibyishimo.”

Musenyeri Rukamba yasabye Musenyeri Nzakamwita kuzakomeza kuba hafi ya Musenyeri Musengamana, kandi avuga ko nk’Inama y’Abepiskopi nabo bazamuba hafi.

Musenyeri Rukamba yasabye Abapadiri ba za Paruwasi zibarizwa muri Diyosezi ya Byumba guha ikaze Umushumba wabo kandi bakamuyoboka
Musenyeri Nzakamwita yari amaze imyaka 26 ayobora diyosezi ya Byumba, agiye mu kiruhuko cy'izabukuru

Saa 2:32 Umuyobozi w’Inama y’Abepiskopi mu Burundi, Mgr Ntahondereye, yabwiye Musenyeri Papias, ko amuhaye ikaze mu nama y’abepiskopi b’u Rwanda n’u Burundi.

Ati "Imana yagutoye ni ikube hafi, igukomeze, iguhunde ingabire zose zikenewe kugira ngo uzabe umushumba ugera ku mutima Imana. Umushumba uragirana urukundo n’impuhwe intama yaragijwe".

Umuyobozi w'Inama y'Abepiskopi mu Burundi, Mgr Ntahondereye, yabwiye Musenyeri Papias, ko amuhaye ikaze

Saa 2:18 Uhagarariye abapadiri ba Diyosezi ya Byumba, Mgr Alfred Rutagengwa, avuga kuri Mgr Nzakamwita.

Ati "Ni urukundo n’impuhwe byaranze, Mgr Nzakamwita na Diyosezi ya Byumba, yarayibungabunze nayo iramukundira maze ayobokana na yo inzira y’ubumwe n’ubwiyunge, bukaba bwarahawe icyicaro mu muryango, ishingiro ry’ikenurabushyo muri diyosezi nziza ya Byumba.

Twari nk’intama zitagira umushumba, twararenzwe n’ibibazo n’agahinda ko kubura abacu, waraje uraduhumuriza, udutoza kwihangana, kubabarira no gukunda, utwereka inzira yo kwiyubaka duhereye mu muryango, none kuri uyu munsi ubukristu buraganje".

Mwatubereye umushumba mwiza urangwa n’ubwitange, umurava n’urukundo none mushoje ikivi n’ibigwi by’ubutwari. Nimukomeze mushimwe n’abana banyu dore ko hafi ya twese ari namwe mwaturamburiyeho ibiganza mukatwinjiza mu ntore z’Imana.

Mgr Rutagengwa avuga kuri Mgr Musengamana yagize ati "Imana mu kubatora yabagiriye icyizere gisesuye, iba ari mwe itoranya muri benshi kugira ngo umuryango wayo ukomeze uyoborwe mu rwuri rutoshye no ku iriba ry’amazi afutse. Mwumvise ugushaka kwayo kandi mwemera ko kuzurizwa mu buzima bwanyu bwa buri munsi.

Ati "Tubakiranye icyubahiro n’urukundo kandi tubijeje kuzabumvira dusohoza neza ubutumwa muzaduha".

Minisitiri w'Intebe, Dr Ngirente ahabwa umubiri wa Kristu
Minisitiri w'Uburezi, Dr Uwamariya Valentine ahabwa umubiri wa Yezu Kristu
Minisitiri w'umutekano, Alfred Gasana ubwo yahazwaga na Mgr Papias
Minisitiri Gatabazi Jean Marie Vianney unavuka muri diyosezi ya Byumba ahabwa umubiri wa kristu
Rwiyemezamirimo Sina Gerard yitabiriye uyu muhango

Saa 2:00 Igitambo cya Misa yo kwimika Musenyeri Musengamana Papias kirahumuje.

Saa 1:51 Mu butumwa bw’Intumwa ya Papa mu Rwanda, yasabye Mgr Papias gukomeza gukorana n’abandi Bepiskopi n’abakristu muri rusange. Yavuze ko Papa ashimira cyane ibikorwa bya Mgr Nzakamwita mu myaka 26 yari amaze ayobora Diyosezi ya Byumba, abakristu, abapadiri n’abihayimana bamufashije.

Saa 1:48 Cardinal Kambanda yasinye ku nyandiko y’uko yahaye Ubwepiskopi, Mgr Papias

Igitambo cya Misa kigiye gukomeza guturwa na Musenyeri Papias Musengamana nyuma yo guhabwa inkoni y’ubushumba. Ni mu gihe cyatangiye kiyoborwa na Cardinal Antoine Kambanda.

Saa 12:35 Igitambo cya misa kirakomeje, aho hakurikiyeho Gutura Imana amaturo.

Ku wa 14 Gicurasi 2022, habaye umuhango wo kwimika Musenyeri Musengamana Papias, wabereye muri Stade ya Byumba. Witabiriwe na Minisitiri w’Intebe w’u Rwanda, Dr Ngirente Edouard
Minisitiri w'Intebe Dr Ngirente asuhuza Musenyeri mushya wa Byumba
Byari ibyishimo byinshi kuri aba bombi
Minisitiri Gatabazi asuhuza Musenyeri Musengamana
Mgr Musengamana ni uwa gatatu wa Diyosezi ya Byumba
Ubwo abapadiri ba Diyosezi ya Byumba bayobokaga Mgr Musengamana
Abakristu bari bamwishimiye cyane
Musenyeri Musengamana asuhuza abakristu anabaha umugisha w'umuganura

Habemus Episcopum!

Abakristu Gatolika ba Diyosezi ya Byumba mu byishimo byinshi bati "Habemus Episcopum" bivuze ngo ’Dufite Umwepiskopi’.

Mgr Papias Musengamana amaze guhabwa ubwepiskopi. Ubu ni umwepiskopi wa Diyosezi Gatolika ya Byumba. Akaba asimbuye Mgr Servilien Nzakamwita wari umaze imyaka 26 ku ntebe y’ubushumba.

Ubwo Cardinal Kambanda yahaga inkoni y'ubushumba Mgr Musengamana
Mgr Nzakamwita na Mgr Musengamana wamusimbuye baramukanya mu byishimo byinshi
Ubu Mgr Papias ni we Mushumba wa Diyosezi ya Byumba
Musenyeri Kizito asuhuza Musenyeri Musengamana wari umaze guhabwa Ubwepiskopi
Hitimana Frederic na Nirabakunzi ababyeyi ba Myr Papias Musengamana mu byishimo byinshi baramukije Umwana wabo wabaye Umwepiskopi
Umubyeyi wa Mgr Musengamana amusuhuza anamwifuriza umugisha

Saa 12:15 Nyuma yo guhabwa Ubwepiskopi, Umushumba mushya Musenyeri Papias yahobeye bagenzi be, ababyeyi n’abavandimwe be.

Yaramukije kandi Minisitiri w’Intebe, Dr Ngirente, Minisitiri Gatabazi. Ni umuhango wakurikiwe n’uwo kuyoboka, ukaba ukorwa n’abapadiri bose. Ni umuhango ukorwa hibukwa ibyo abapadiri basezerana byo kubaha Umwepiskopi n’abazamusimbura bose.

Uyu muhango wakurikiwe no gutambagira ubushyo bw’Imana yaragijwe ari nako abuha umugisha w’umuganura.

Yambikwa ingofero y'ubushumba ngo ayobore intama z'Imana
Ubwo Mgr Musengamana yasigwaga amavuta mu mutwe
Musenyeri Papias w'imyaka 55 niwe watorewe kuyobora Diyosezi ya Byumba

Saa 12:10 Yambitswe impeta asabwa kuragira neza Kiliziya, umwari w’Imana. Ni umuhango ukurikirwa no kwambikwa ingofero imwibutsa umwete agomba kugira mu kuragira neza intama z’Imana.

Kubera ko ari umushumba, ahabwa n’inkoni y’ubushumba. Byerekana umurimo ashinzwe wo kuyobora Kiliziya aragijwe.

Cardinal Kambanda ati ni "Ikimenyetso cy’umurimo w’ubushumba uhawe ujye wita ku bushyo bwose uhawe nk’uko Roho Mutagatifu abugushyizemo, ngo ube umushumba uyobora Kiliziya y’Imana".

Abayobozi mu nzego nkuru za polisi y'u Rwanda bari bahari, uyu ni ACP Teddy Rumanzi
Umuyobozi w'Urwego rw'Imiyoborere RGB, Dr Usta Kaitesi ni umwe mu bayobozi mu nzego bwite za Leta witabiriye uyu muhango
Inararibonye Rucagu Boniface na we yitabiriye umuhango wo kwimika Musenyeri Papias Musengamana

Saa 12:05 Musenyeri Papias agiye gusigwa amavuta ka kirisima mu mutwe. Ni mu gihe abahabwa ubupadiri basigwa aya mavuta mu biganza naho abahabwa andi masakaramentu bakayisigwa mu gatuza. Nyuma y’aho arashyikirizwa igitabo cy’amavanjiri kimwibutsa ko kwigisha inkuru nziza ari wo murimo agomba gukora ubudahwema.

Saa 11:58 Abepiskopi batandukanye barimo kuramburira ibiganza kuri Musenyeri Musengamana, nyuma y’uyu muhango aravugirwaho isengesho ry’iyeguriramana. Ni isengesho rivugwa abadiyakoni babiri bafatiye ku mutwe we igitabo cy’amavanjiri kibumbuye. Bisobanuye ko umurimo w’ibanze w’Umwepiskopi wo kwigisha ivanjiri.

Saa 11:48 Umuhango wo kwiyambaza abamarayika beza n’abatagatifu b’Imana. Uwatorewe Ubwepiskopi ararambarara hasi nk’ikimenyetso cy’uko yirunduriye wese mu biganza bya Nyagasani.

Yambikwa ingofero y'ubushumba ngo ayobore intama z'Imana

Saa 11:44 Mbere yo kurambikwaho ibiganza, Musenyeri Musengamana yakoze amasezerano y’ubutumwa bw’Umwepiskopi ashingiye ku bintu bitatu ari byo; gukorana umurava umurimo ashinzwe agendeye ku matwara ahuje n’aya Kristu, kunga ubumwe n’urugaga rw’Abepiskopi ndetse no kubaha Papa umusimbura wa Petero Intumwa.

Musenyeri Musengamana yabajijwe niba ashaka kuzatunganya izi nshingano yahawe zirimo kujya arinda inganzo y’ukwemera kugira ngo ihore ari indakemwa n’intageruka akurikije uruhererekane ruturuka ku ntumwa, ati “Ndabishaka”

Abajijwe niba ashaka kuzakomeza kubaka Kiliziya ayobowe n’Umusimbura wa Mutagatifu Petero Intumwa [Papa], ati “Ndabishaka”

Abajijwe niba ashaka kwitangira imbaga Ntagatifu y’Imana maze akayiteza imbere ayiyobora inzira y’umukuro, ati “Ndabishaka.”

Abajijwe niba ashaka kuzajya yakirana impuhwe abashonji n’indushyi abigiriye impuhwe za Nyagasani, ati “Ndabishaka”

Cardinal Kambanda yamusabiye umugisha avuga ati ‘Imana yagutangiyemo umurimo mwiza izanawukomeze kugera ku ndunduro.”

Saa 11:30: Gusoma ubutumwa bwa Papa Francis

Urwandiko rukubiyemo ubutumwa bw’Umushumba wa Kiliziya Gatolika ku Isi, Papa Francis bugenera Musenyeri Musengamana Papias ubutumwa bwo kuyobora Diyosezi ya Byumba.

Buvuga ko “Twasanze ubereye rwose gukora uyu murimo, kubera iyi mpamvu nyuma yo kugisha inama ibiro bishinzwe iyogezabutumwa, tukugize Umushumba wa Diyosezi ya Byumba.”

Ubu butumwa bukomeza busaba Musenyeri Musengamana ko “Wowe rero mwana wacu dukunda, mu mvugo no mu ngiro, shishikarira ubutaretsa gutoza ubushyo bwawe gukurikiza neza amabwiriza y’Ivanjiri.”

Saa 11:18: Umuhango wo gutanga Ubwepiskopi uratangiye

Nyuma yo kuririmba igisingizo cya Roho Mutagatifu ’Venite Creator Spiritus’, hakurikiyeho kwerekana uwatowe no gusoma urwandiko rwa Papa rumugenera uwo murimo w’Ubwepiskopi.

Nk’uko umuco wa Kiliziya Gatolika ifite icyicaro i Roma ubiteganya, ubwepiskopi butangwa hari abepiskopi babiri bagaragiye ubutanga. Bivuze ko Mgr Musengamana abuhabwa na Cardinal Kambanda, agaragiwe na Musenyeri Philippe Rukamba na Mgr Nzakamwita.

Kuri uyu wa Gatandatu tariki 14 Gicurasi 2022, ni umunsi udasanzwe ku bakristu ba Diyosezi ya Byumba bakoraniye muri Stade ya Gicumbi ngo bakire umushumba mushya Mgr Musengamana watowe kuwa 28 Gashyantare 2022.

Ni umuhango witabiriwe na Cardinal Antoine Kambanda ari nawe uyobora igitambo cya misa kiri butangirwemo ubwepiskopi.

Hari kandi Mgr Ntahondereye Joachim wa Diyosezi ya Muyinga ari na we uyobora inama y’Abepiskopi mu Burundi, Musenyeri Celestin Hakizimana, Mgr Anaclet Mwumvaneza, Mgr Vincent Harolimana, Mgr Edouard Sinayobye, Mgr Philippe Rukamba, Mgr Kizito Bahujimihigo ,Umwepiskopi wacyuye igihe wa Kibungo.

Umuhango wo kwimika Umwepiskopi mushya wa Byumba, Musenyeri Musengamana Papias witabiriwe kandi n’abayobozi mu nzego nkuru z’igihugu barimo Minisitiri w’Intebe, Dr Ngirente Edouard ari nawe mushyitsi mukuru.

Hari kandi Minisitiri w’Ubutegetsi bw’Igihugu, Gatabazi Jean Marie Vianney, Minisitiri w’Umutekano mu Gihugu, Gasana Alfred, Minisitiri w’Uburezi, Dr Uwamariya Valentine, Minisitiri wa Siporo, Munyagaju Aurore Mimosa n’Umuyobozi Mukuru w’Urwego rw’Imiyoborere, RGB, Dr Usta Kayitesi.

Hari kandi Abasenateri n’Abadepite, ubuyobozi bw’Intara y’Amajyaruguru, abayobozi mu nzego za Polisi n’Ingabo n’abandi.

Intego ya Mgr Musengamana ni 'In Caritate et Misericordia'
Musenyeri Musengamana yerekanwa ngo asuhuze abakristu mbere y'uko igitambo cya misa gitangira
Musenyeri Papias yari umuyobozi wa Seminari Nkuru ya Nyakibanda

Iyi misa irimo kuririmbwa na Chorale yo muri Seminari Nkuru yitiriwe Mutagatifu Karoli Boromewo Nyakibanda, aho Musenyeri Musengamana Papias yayoboraga ndetse n’iyo mu Ishuri ryisumbuye rya Groupe Scolaire de la Salle NP/TTC Byumba.

Cardinal Kambanda yavuze ko Musenyeri Musengamana ari buramburirweho ibiganza n’abepiskopi nk’intumwa kugira ngo ahabwe ububasha bwa Roho Mutagatifu bwo kuyobora imbaga y’Imana no kuyitagatifuza afatanyije na Papa Francis.

Musengamana wagizwe Musenyeri wa Diyosezi ya Byumba, yavutse ku wa 21 Kanam 1967. Yahawe ubupadiri tariki 18 Gicurasi 1997. Afite impamyabumenyi y’Ikirenga muri Théologie yakuye mu Budage mu 2006.

Uyu mugabo w’imyaka 55, yavuze ko na we yatunguwe n’inshingano yahawe na Papa Francis, dore ko ubwo byatangazwaga tariki 28 Gashyantare ko ari we uzasimbura Musenyeri Nzakamwita, yari amaze umunsi umwe abimenyeshejwe.

Ubwo yaganiraga n’abashinzwe itumanaho mu nama Nkuru y’Abepiskopi Gatolika, Musenyeri Musengamana yagize ati “Nanjye nabimenye umunsi umwe mbere y’uko babivuga ku mugaragaro, ubu ntabwo nari nafata intego ngo mvuge ngo izaba ari iyo kuko burya ijyana na gahunda y’iyogezabutumwa. Intego ndacyayitekerezaho ariko mu minsi idatinze izaba imaze kugaragara, ijye ahagaragara.”

Yavuze ko ikimujyanye i Byumba ari ugukorera abakiristu kuko “Nibo ntumweho, nkaba hafi yabo nkabakorera nkabafasha mubyo nshobora kubafashamo by’iyogezabutumwa. Nkabijyanisha no gusenga kuko umusaserdoti ntiyabishobora adasenga. Ni ukubaha icyiza wumva wifitemo kugira ngo kibafashe.”

Yavuze ko yanga ikibi n’akarengane, ari nabyo azashyira imbere mu nshingano nshya yahawe agamije ko abakiristu bumva ko Kiliziya ibakunda.

Ati “Icyo nanga ni ikibi, ni nacyo ivanjili itwigisha. Ikindi nanga ni ibyaba bivuguruza ivanjili byose cyane cyane icyitwa akarengane. Ntabwo nifuza ko hari uwarengana cyangwa ngo arenganywe ahubwo icyiza nakora ni umufasha kugira ngo yumve ko Kiliziya imukunda.”

Cardinal Antoine Kambanda ni we watuye igitambo cya misa Mgr Musengamana yaherewemo Ubwepiskopi
Ubwo Abepiskopi bari mu mutambagiro wabanjirije Misa Ntagatifu
Byari ibyishimo ku bakristu ba Diyosezi Gatolika ya Byumba
Ubwo abapadiri ba Diyosezi ya Byumba bari mu mutambagiro
Ni umuhango witabiriwe n'abasenyeri benshi
Antoine Cardinal Kambanda ni ubwa mbere yari ageze muri Diyosezi ya Byumba kuva yagirwa Cardinal

Incamake y’amateka ya Diyosezi ya Byumba

Diyosezi ya Byumba yashinzwe ku wa 5 Ugushyingo 1981, igizwe n’ibice byomowe kuri diyosezi ya Ruhengeri na Kibungo. Ifite ubuso bugera kuri Km² 5100, ikaba igizwe ahanini n’igice cy’amajyarugu y’Iburasuzuba bw’u Rwanda. Ihana imbibi na Tanzania mu Burasirazuba na Uganda mu Majyaraguru.

Mu Majyepfo y’iburasirazuba ihana imbibi na diyosezi ya Kibungo, mu majyepfo y’iburengerazauba na arkidiyosezi ya Kigali naho mu burengerazuba igahana imbibi na diyosezi ya Ruhengeri.

Ikimara gushingwa, umwepiskopi wa mbere wayo yabaye Musenyeri Yozefu Ruzindana. Yatorewe kuyibera umwepiskopi ku wa 14/11/1981 yimikwa ku wa 17/01/1982. Yitabye Imana ku wa 05/06/1994 yiciwe i Gakurazo (Kabgayi).

Kuva mu kuboza 1994 kugeza mu w’1996, Myr Ferederiko Rubwejanga wari umwepiskopi wa Kibungo, yabaye n’umuyobozi wa Byumba. Ku wa 25/03/1996, Nyirubutungane Papa Yohani Pawulo wa II, yatoreye Padiri Serviliyani Nzakamwita kuba umwepiskopi wa Byumba, ahabwa inkoni y’ubushumba ku wa 2/06/1996.

Kuwa 28 Gashyantare 2022 Musenyeri Nzakamwita Sylverien yasimbuwe ku mwanya w’Umwepisikopi wa Diyosezi ya Byumba na Papias Musengamana wari usanzwe ari Umuyobozi wa Seminari Nkuru ya Nyakibanda.

Musenyeri Musengamana ubwo yari mu mutambagiro
Abayobozi mu rwego rwa Leta bitabiriye uyu muhango ari benshi
Minisitiri w'Ubutegetsi bw'Igihugu Jean Marie Vianney Gatabazi yitabiriye uyu muhango
Umupadiri watwaye ijambo ry'Imana ryasomwe uyu munsi
Musenyeri Kizito Bahujimihigo, Umwepiskopi wacyuye igihe wa Kibungo
Musenyeri Anaclet Mwumvaneza wa Nyundo yitabiriye uyu muhango na we
Cardinal Kambanda ubwo yari mu mutambagiro
Musenyeri Philippe Rukamba wa Butare akaba na Perezida w'inama y'Abepiskopi Gatolika mu Rwanda
Cardinal Kambanda atanga umugisha
Minisitiri wa Siporo Aurore Munyangaju na we yitabiriye uyu muhango
Minisitiri w'Intebe, Dr Edouard Ngirente yitabiriye uyu muhango watangiwemo ubwepiskopi bwa Musenyeri Musengamana

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .