Abana mu myaka, intyoza mu kuryoshya indirimbo: Igisekuru gishya mu ba-’producer’

Yanditswe na Uwiduhaye Theos
Kuya 14 Nzeri 2020 saa 08:32
Yasuwe :
0 0

Bafite impano zitangaje mu gucuranga no gutunganya indirimbo, bakaba intyoza zifite ugutwi kumva vuba ibya muzika.

Ni igisekuru gishya cyazanye impinduka mu gutunganya indirimbo, ndetse byatumye abari kubyiruka muri iki gihe biyumva mu muziki bakora mu buryo butangaje, n’ubwo abenshi batazwi ahubwo ibikorwa byabo bibasumbya kumenyekana.

Igitangaje ni uko iyo uganiriye na benshi muri bo bakubwira ko nta shuri ryihariye babyizemo ahubwo bagiye bavoma ubumenyi ahantu hatandukanye, bakabukusanya kugeza ubwo babonye ko babikoze nk’umwuga byababyarira umugati. Nibo bari gukora indirimbo zikunzwe cyane mu rubyiruko ndetse n’izindi ziri kwiyumvwamo n’ibindi bisekuru bitari mu rungano rwabo.

Abenshi ni abana mu myaka! Ariko iyo begereye Piano cyangwa mudasobwa bari gutunganya indirimbo, bakwereka ubuhanga ukumirwa ukagira ngo uri kurota.

Ibihe biha ibindi…

Mu mpinduramatwara y’umuziki yazanywe n’aba-producer batandukanye ubu bafatwa nk’abanyabigwi, hazamo bamwe mu bafite amazina akomeye, ndetse na n’ubu bakirahirwa.

Nko mu myaka ya mbere ya 2008 Jay Pro niwe wafashije abahanzi batandukanye bo muri ibyo bihe, ndetse indirimbo nyinshi zamenyekanye za Rafiki niwe wazirambitseho akaboko.

Yaje akurikirwa n’abandi benshi bubatse izina mu buryo bukomeye barimo Producer Moses, Dr Jack, Nicolas, Mastola n’abandi benshi ubu bibukirwa ku bihangano binyura benshi bagiye bakora.

Urutonde ni rurerure kuko abandi barimo Pastor P, Lick Lick, Barick Music, BZB The Brain, Fazzo Pro, Piano the Grooveman, Junior Multi System, T Brown , Devy Denko, Ray P, Trackslayer n’abandi; utabavuze akazi bakoze waba ukarengeje ingohe.

Abaherukaga kwiharira ikibuga cy’abatunganya indirimbo mu Rwanda bari barangajwe imbere na MadeBeats, Knox Beats na Iyzo Pro.

1. Element

Element ubusanzwe witwa Mugisha Fred Robson afite imyaka 20 y’amavuko, ni umusore wavukiye akanakurira i Karongi mu Burengerazuba bw’u Rwanda, avuga ko mu bwana bwe yari afite inzozi zo kuzaba umukinnyi ukomeye w’umupira w’amaguru, ariko nyuma yaje kwisanga ari umuririmbyi none ubu atunganya indirimbo.

Ubwo yajyaga kwiga mu cyiciro cya kabiri cy’amashuri yisumbuye, nibwo yaretse ibyo gukina umupira w’amaguru nyuma y’aho, yari amaze kugirwa DJ w’ikigo ari nabwo yatangiye kwiga gucura injyana akoresheje FL Studio.

Umunsi umwe yavuye iwabo ajya mu mujyi wa Kigali, aho yari mu bijyanye no guhinduza indangamuntu ye, ariko birangira ahuye na Iyzo Pro wakoreraga muri NEP Records.

Element wari ufite gahunda yo kwereka Iyzo ko ari umucuranzi mwiza, byarangiye agaragaje impano yo kuririmba, amusaba ko yaba n’umuhanzi.

Iyzo ngo yaje kubura umwanya, amuhuza n’ubuyobozi bwa Country Records ngo bumukurikirane mu muziki, ariko kuburabuzwa n’abatunganya indirimbo bimutera umujinya wo kureka kuririmba yiyemeza gusubira mu bya mbere.

Abifashijwemo n’umuyobozi wa Country Records, NoopJa yashatse amahugurwa y’amezi atandatu mu bijyanye no gutunganya indirimbo yahawe n’aba producers bo muri Nigeria.

Uyu musore yamenyekanye ubwo yakoraga indirimbo ya Bruce Melodie yise ‘Henzapu’ yahise ituma atangira kurangamirwa na benshi.

Element ubu ari mu batunganya indirimbo bahanzwe amaso, cyane amaze gukora indirimbo nyinshi zirimo izikunzwe muri iki gihe nk’iya David D yise ‘Micro’, ‘Saa Moya’ ya Bruce Melodie, ‘Kola’ ya The Ben n’izindi nyinshi. Hari amakuru avuga ko ari no gukora kuri album nshya ya Meddy.

Element afite ubuhanga bwihariye mu gutunganya indirimbo
Clement aherutse gusura Producer Element, uri gutangarirwa na benshi kubera ubuhanga bwe

2. Laser Beat

Laser Beat asanzwe akorera muri Studio ye yitwa The Beam Beat Records. Ubusanzwe yitwa Patrick Hirwa akaba nawe ari umwe mu bari kwitwara neza muri iki gihe.

Avuga ko mbere yabanje gukora aka kazi ariko akaza kubyirundumuriramo nk’umwuga mu 2017, ati “Natangiye gukora indirimbo mu buryo bw’amajwi nk’akazi mu 2017.”

Mu ndirimbo yakoze zigakundwa byimazeyo harimo ‘Indorerwamo’ ya Kjohn na All Stars, ‘Akuka’ ya Dj Lenzo na Sintex, ‘Zana’ nayo ya Lenzo na Bulldog, ‘Takaramo’ ya Martin Promo n’izindi.

Aherutse gukora Mixtape yitwa ‘Ku gasozi’ y’umusore witwa Rich1. Yari iriho indirimbo zirimo ‘Ku gasozi’ ya Rich1 na na Samlo, ‘No Shortcut’ yakoranye na Gisa, ‘Uyu munsi’ yakoranye na Fireman ndetse na Twenty Twenty ( 2020).

Laser Beat niwe muyobozi mukuru (CEO) wa The Beam Beat Records, ifite andi mashami arimo The Beam Image ikora amashusho. Aherutse gukora indirimbo iheruka kujya hanze na Dj Lenzo yitwa Agapfukamunwa. Ubu ari kwitegura gushyira indirimbo z’abandi bahanzi zirimo iya Mico The Best na Amag The Black n’izindi.

Laser Beat afite umwihariko wo kugira ugutwi kumva cyane injyana ziganjemo ‘Afrobeat’ na ‘Hip Hop’ gusa n’izindi zose arazikora kandi neza.

Laser Beat ni umwe mu batunganya indirimbo bari kwitwara neza muri iki gihe

3. Dizo Last

Dizo Last, ni umwe mu bakora indirimbo za Trap, ikunzwe na benshi mu rubyiruko rw’iki gihe, ni nawe wagize uruhare mu kuzamura abaraperi bagezweho mu Rwanda barimo B-Threy.

Yakoze indirimbo zitandukanye zakunzwe mu rubyiruko zirimo ‘Tsikizo’ yafatanyije na Bushali, ‘250’ ya Slum Drip, B-Threy na Bushali, ‘Nihe’ ya B-Threy na Trizzie Ninety Six.

Dizo atandukanye n’abandi batunganya indirimbo bamamaye mu Rwanda barimo Lick Lick, Madebeats, Pastor P, Bob, Clement Ishimwe n’abandi kuko we afite umwihariko wo gukora hip hop gusa mu gihe bo nta mwihariko w’injyana imwe bagiye baza ariyo bakora gusa batabivanga n’izindi.

Uyu musore yavutse ku wa 4 Kamena 1996. Mu mashuri yisumbuye yize ibijyanye na Topographie hanyuma muri Kaminuza yiga ibijyanye n’ikoranabuhanga.

Yabwiye IGIHE ko yakuze yiyumvamo injyana ya Hip Hop ndetse akumva indirimbo z’abahanzi benshi bakunzwe muri iyi njyana ku Isi yose n’ubu bafite ibigwi. Mu Rwanda avuga ko nta wukora indirimbo (Producer) areberaho ariko hanze hakaba benshi barimo Metro Boomin, Boi 1da, Noah ’40’ Shebibi n’abandi.

Iyo umubajije impamvu akora indirimbo zo mu njyana ya Hip Hop gusa akubwira ko ‘nkunda Hip Hop kandi nyiyumvamo ntabwo ari ibintu nshakisha’.

Akubwira ko impamvu atunganya Hip Hop gusa, ashaka kugira uruhare rukomeye mu kuzamura umuziki nyarwanda muri iyi njyana, hanze y’igihugu ikaba yacuruza ku rwego rwa Afurika n’isi yose.

Dizo Last yakoranye n’abahanzi bo mu gisekuru gishya muri Hip Hop barimo B-Threy, Trizzie Ninety Six, Bushali, Slum Drip, Mazimpaka Prime, Angelo Jawanzaa, Ice Nova n’abandi benshi. Mu bakuru yakoranye na Bull Dogg.

Dizo Last yatangiye label ya Ratio Music ifite na studio ikoreramo abahanzi harimo B-Threy, Trizzie Ninety na Angelo Jawanzaa, akaba ariwe ubatunganyiriza indirimbo zikorerwamo.

Dizo Last, umwe mu bagezweho mu gutunganya indirimbo ziganjemo Hip Hop wakoranye na benshi bazwi

4. Dr Nganji

Uyu musore ubusanzwe witwa Dominic Ngabonziza uzwi nka Dr. Nganji niwe uhagarariye Green Ferry Music. Yayishinze mu 2012, iherereye Kicukiro aho irimo abahanzi batandukanye barimo Bushali, Prime Mpazimpaka, Icenova, Weya Viatora, Pogatsa, Slum Drip, Neriwest, Maktain n’abandi.

Dr. Nganji ni umusore w’imyaka 28 niwe kuboko gufashe Green Ferry Music, yabwiye IGIHE ko yagize igitekerezo cy’iyi nzu ifasha abahanzi mu 2012 ubwo yahuraga na mugenzi we witwa Yawo, bahita batekereza gukora studio izaba ikomatanya no gufasha abahanzi, mu 2013 batangira gukora.

Ubu ikipe igize iyi nzu igeze ku bantu bari hagati ya 15 na 20 barimo abahanzi n’abandi baba hafi yabo. Mu 2016 nibwo batangiye gukora mu buryo bw’umwuga.

Nganji ati “Green Ferry Music ni label nto ahanini igendera ku bitekerezo by’abantu, hagati y’umuhanzi na label turafashanya, twe intego dufite ni ukuvumbura impano.”

Ifite intego yo kuba mu myaka 20 iri imbere haba hari urubyiruko rwinshi rwabonye akazi kubera yo.

Dominic Ngabonziza uzwi nka Dr. Nganji niwe ukorera indirimbo z'amajwi abahanzi bose babarizwa muri Green Ferry

5. Kenny Pro Beat

Amazina ye asanzwe yitwa Jean Pierre Kenny, yavutse mu 1993. Avuka mu bana batatu akaba bucura. Yavukiye mu Ntara y’Iburengerazuba mu karere ka Rubavu gusa atangiye gutunganya indirimbo aza kuba mu Mujyi wa Kigali.

Iyo asobanura impamvu yavuye mu Mujyi wa Rubavu akaza muri Kigali asobanura ko byatewe n’uko yashakaga kuba ahantu hari igicumbi cy’umuziki.

Ati “Urabona abanyamuziki benshi baba i Kigali gukorera mu Ntara nabonaga ari ibintu bizangora mpitamo kuza muri Kigali kandi byarampiriye.”

Yarangirije amashuri yisumbuye mu ishami rya Computer Electronic mu Indangaburezi mu Ruhango. Yatangiye gutunganya indirimbo mu 2016. Ariko avuga ko yatangiye guhirwa mu 2017 kuzamura.

Niwe wakoze indirimbo zirimo izigezweho mu rubyiruko zirimo nka ‘Madam’ na ‘Vanessa’ za K1Vumbi K1ng, ‘Gukunda’ ya Ange Rita Kagaju, ‘Igitabo’ ya Symphony, ‘Njye nawe’ ya Kenny Sol n’izindi.

Kenny Pro Beats umwe mu batunganya indirimbo bagezweho muri iki gihe

6. Kina Beat

Uyu musore ubusanzwe yitwa Nshimiyimana Clement. Yavutse ku wa 13 Werurwe 1997. Yasoje amashuri ye mu cyiciro cya mbere cya kaminuza aho yarangirije muri IPRC Kicukiro mu 2019, aho yize ishami rya Multimedia.

Uyu musore amaze imyaka ibiri atangiye gukora indirimbo aho akorera muri Studio ya Coffee Sound Music.

Avuga ko gukora umuziki atari ibintu byamujemo gutyo gusa kuko akiri umwana yagaragazaga ibimenyetso byo gukunda, umuziki ndetse akagenda agerageza ibintu bitandukanye birimo kuririmba no kubyina ariko byose bikaza kumwangira akaza kwisanga atunganya indirimbo.

Avuga ko yatangiye akora beat z’indirimbo ameze nk’uwishimisha ndetse abavandimwe be bakajya bamuseka. Ati “Natangiye kugerageza ibyo gutunganya niga mu mashuri yisumbuye mu gihe abandi babaga bahuze bari mu bindi njye nabaga ndi kugerageza gukora indirimbo. Ntabwo numvaga ko bizaba umwuga ahubwo numvaga ari ukwishimisha.”

Amaze gukora indirimbo zitandukanye zirimo iz’abahanzi bari kwitwara neza nka B Threy, Ish Kevin n’abandi benshi bari gutanga icyizere mu muziki nyarwanda. Afite umwihariko w’uko ariwe muri aba ba-producer kuzamuka ndetse n’abandi bamubanjirije, wo gukora injyana ya Drill music itamenyerewe mu Rwanda.

Kina Beat umwe mu basore bo kwitegwaho byinshi mu batunganya indirimbo bari kubyiruka

7. Jumper Keellu

Uyu musore witwa Jumper Keellu atunganya indirimbo, ziri mu njyana yo mu bwoko bwa Electronic Dance Music [EDM].

Jumper Keellu niwe wakoze indirimbo yahuriyemo na Uwayezu Ariel [Ariel Wayz] usanzwe azwi muri Symphony Band, iyi bayise ‘The Boy from Mars’ yagiye hanze tariki 14 Werurwe 2020 ikundwa na benshi ndetse hari n’abari banze kwemera ko yakozwe n’Umunyarwanda.

Hari iyo yakoranye na Alyn Sano yise ‘Needed You’ aherutse gukorana n’Umurusiyakazi witwa Natasha Shayenne, iyo bise ‘Till Dawn’.

Jumper Keellu yavuze ko impamvu yahisemo gukora umuziki wa Electronic dance music [EDM], ari uko ariwo yisangamo cyane kurusha izindi njyana, ndetse ukaba unabyinitse ku buryo byorohera abashaka kwidagadura, bawubyina. Uyu musore asanzwe atunganya indirimbo ariko ze gusa, ubu ari kwiga ibijyanye no kuvanga imiziki.

Jumper Keellu afite intumbero yo kugeza kure umuziki nyarwanda yifashishije injyana ya EDM

8. Dany beats

Mu basore bagezweho mu ruganda rwo gutunganya indirimbo z’amajwi, Dany Beats ari mu bari kwigaragaza muri iki gihe, nta n’uwatinya kuvuga ko aza mu b’imbere.

Ni we wakoze indirimbo z’abahanzi batandukanye bo mu gisekuru gishya nko ‘Ku Gasima’ ya Bushali, ‘Twifunze’ ya Sintex, ‘Fever’ ya Kivumbi, ‘Jamaa’ ya Ange Rita Kagaju, ‘Special’ ya Kevin Skaa n’izindi z’abahanzi bari kuzamuka muri iyi minsi.

Ubusanzwe yitwa Izere Daniel, afite imyaka 24. Yasoje amashuri yisumbuye mu ishami ry’amashanyarazi.

Mu 2012 ubwo yari afite imyaka 17, nibwo yatangiye kwiga gucuranga, biramuhira kugeza ubwo yatangiye gukorana n’abahanzi batandukanye.

Avuga ko muri icyo gihe yakundaga abahanzi barimo Usher, Trey Songz na Chris Brown ariko mu gutunganya indirimbo agakora Hip Hop kuko ariyo yabaga yoroshye muri ‘FL Studio’.

Atangira yakoranye cyane n’abahanzi barimo Angel Mutoni uri mu bakobwa bakora Hip Hop mu Rwanda. Indirimbo ya mbere ya Dany Beats yakoze yari iye yitwa ‘Bad Girl Swagg’. Mu mashuri yisumbuye Dany Beats yiganye na Made Beats muri SOS Technical High School i Kagugu, ari naho batyarije ubumenyi.

Dany Beats ni umwe mu batunganya umuziki bagezweho mu Rwanda

9. Li John The Real Beat

Uyu musore ubusanzwe yitwa Iradukunda Jean Aime afite imyakka 24 y’amavuko. Yavukiye mu Bugesera mu Ntara y’Iburasirazuba mu 1996. Yize Computer Science.

Mbere yo kuba utunganya indirimbo yabanje kuba umuraperi kubera gutenguhwa ahitamo kujya azikorera, ati “Natangiye gukora indirimbo mu 2012, kera nari umuraperi, rero mpana gahunda n’umu-Producer arayica kandi namwishyuye, ngira umujinya mpita mfata umwanzuro wo kujya indirimbo nzikorera.”

Avuga ko yahise yifashisha computer yari afite agashakisha software zifashishwa mu gukora indirimbo, akagenda yihugura ku buryo mu 2015 yahise atangira gukora aka kazi nk’umwuga.

Uyu musore yakoreye muri Uno Music, The Mane Music ndetse ubu ari gukora muri Storykast Record iherereye kwa Ndamage mu Mujyi Rwagati.

Yakoze indirimbo zakunzwe zirimo ‘Log out’ ya Marina, iza Jay Polly zirimo ‘Uramfite’, ‘Bipapare’ na ‘Nyirizina’ n’izindi z’abandi bahanzi bakomeye mu Rwanda. Ubu ari gukorana n’abahanzi bagezweho barimo France Gusenga, Amalon, Alyn Sano n’abandi.

Li John ubu akorera muri Storykast record

10. Pro Zed

Uyu musore ubusanzwe yitwa Ngabonziza Shema Darcin. Avuga ko yatangiye kwiga gutunganya indirimbo mu 2015.

Ati “Gukora indirimbo nabitangiye mu 2015 ari software ya FL Studio mbonye nkajya nyifashisha nkora beat, biza kuvamo akazi. Mfite intumbero yo kuzana ibintu bishyashya abantu badasanzwe bazi mu muziki wo mu Rwanda.”

Zimwe mu ndirimbo amaze gukora zirimo album yitwa ‘Rwanda rw’ejo’ yahuriyeho abahanzi nka Ish Kevin, Kenny K Shot; ‘Nicyo Gituma’ ya B Threy, ‘Vayo’ ya Ish Kevin n’izindi.

Mu gutunganya indirimbo kwe yibanda ku njyana zirimo Hip Hop, Pop, Drill Music na RnB.

Pro Zed umwe mu batanga icyizere cy'ejo heza mu gutunganya indirimbo

11. Joe Ka$$h

Mugisha Joe Liam, afite imyaka 20. Yavukiye mu Mujyi mu karere ka Nyarugenge. Yasoje amashuri yisumbuye kuri IFAK Kimihurura aho yize Imibare, Mudasobwa ndetse n’Ubukungu (MCE).

Avuga ko yatangiye gutunganya indirimbo yiga mu mashuri yisumbuye. Ati “Natangiye gutunganya indirimbo niga mu mwaka wa kane w’amashuri yisumbuye. Nabanje kuba umuhanzi, ndi umuraperi. Nyuma gutunganya indirimbo biza kuntwara.”

Yatangiye gukora ibijyanye no gutunganya mu mwaka ushize mu 2019 mu Ukuboza. Avuga ko intumbero afite ari ukugera kure, ati “Intumbero mfite ni ukuba producer mpuzamahanga.” Uyu musore mu kazi ke akora injyana zirimo Hip Hop, RnB na Afrobeat.

12. Makembe

Uyu musore afite impano itangaje mu gutunganya indirimbo mu buryo bwihariye burimo ibicurangisho bya Kinyarwanda nk’icyembe n’ibindi bidakunze gukoreshwa cyane muri iki gihe. Michael Makembe ni n’umuririmbyi cyane cyane wa Afro Fusion akaba n’umwanditsi .

Ubusanzwe yitwa Ishimwe Michael. Yavukiye i Remera mu Mujyi wa Kigali, ni bucura mu bana batanu b’iwabo. Akorera muri label ya TBK Records iherereye mu Kiyovu.

Yatangiye ibijyanye n’umuziki cyane kuririmba afite imyaka 10, ndetse yiga mu mashuri abanza yakundaga gutoranywa mu baririmba ku munsi wo gusoza umwaka. Indirimbo ya mbere yanditse yitwaga ‘Thanks Mama’.

Mu 2017 ari mu banyeshuri basoje amashuri yabo mu ishuri ry’umuziki ryo ku Nyundo ubu ryimukiye mu karere ka Muhanga, aha niho yavomye ubumenyi bujyanye no kuririmba aza kwiyigisha gucuranga yifashishije urubuga rwa Youtube.

Mu micurangire ye yifashisha ibicurangisho bitandukanye birimo Guitar, Harmonica n’Icyembe cyifashishwaga mu muziki gakondo w’abanyarwanda.

Makembe ni umwe mu banyempano bakomeye mu gutunganya indirimbo ndetse no kuziririmba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .