Bwa mbere, Zizou Alpacino yasinyishije umuhanzi agiye gufasha

Yanditswe na Nsengiyumva Emmy
Kuya 21 Ugushyingo 2020 saa 08:21
Yasuwe :
0 0

Nyuma y’imyaka myinshi afasha abahanzi mu buryo butandukanye ariko nta we bafitanye amasezerano y’imikoranire, Zizou Alpacino yafashe umusore agiye gukorana na we mu buryo bwo kuzamura impano ye no kumufasha kuyibyaza umusaruro.

Zizou uri mu bamaze igihe mu muziki afasha abahanzi, ni na we muyobozi wa Monster Record, studio iri mu zigezweho.

Nyuma yo gukorwa ku mutima n’impano ya Mutuyimana Charles winjiranye mu muziki izina rya Pride, Zizou yahise asinyana na we amasezerano yo gukorana akamufasha kugaragaza impano ye no kuyibyaza umusaruro nk’umuhanzi wo muri Monster Record.

Zizou avuga ku mpano y’uyu musore nuko bahuye, yagize ati ”Ni umusore ufite impano, buri wese uri bwumve indirimbo ye ya mbere arabasha kumva ubuhanga bwe. Mpura nawe rero ni Producer wo muri Monster wamunyeretse, Knoxbeat baziranye kuko bose ari ab’i Nyanza; ni we wamuzanye kuko yari azi ko nkeneye umuhanzi twakorana.”

Zizou yirinze kuvuga mu buryo bweruye amasezerano yasinyanye n’uyu musore. Yasubije ati "Icy’ingenzi ni uko tugiye gukorana kandi twifuza kugerana kuri byinshi, ibindi ni ibanga rikubiye mu masezerano twagiranye.”

Pride usanzwe atuye mu Karere ka Nyanza aganira na IGIHE yavuze ko yishimiye kuba agiye gukorana na studio ikomeye mu gihugu nka Monster Record ahamya ko yizeye kuzagera kuri byinshi.

Uyu musore uhamya ko azajya akora umuziki yitahira i Nyanza ku ivuko, yarangije amashuri yisumbuye mu by’Indimi mu 2019.

Avuga ko yakuze akunda kuririmba ndetse no ku ishuri bari bamuziho iyi mpano, yongeyeho ko bagenzi be biganaga ari bo bakunze kumutera imbaraga ko aramutse abishyizemo intege yazagera kure.

Ati “Ni kwa kundi uba usanzwe uririmba, kuva mu 2018 abo twiganaga batangiye kunyereka ko ndamutse nshyize ingufu mu muziki nazagera kure.”

Pride avuga ko nubwo yari yaramaze kubona ko afite impano, byari bigoye kwishora mu muziki kubera kutagira ubushobozi.

Yigiriye inama yo kwegera Knoxbeat nk’umwe mu bantu b’iwabo bari mu ruganda rwa muzika baziranye, amwereka impano ye amusaba ko yamufasha.

Knoxbeat na we wari wanyuzwe n’impano y’uyu musore yahisemo kujya kumukorera ubuvugizi kwa shebuja Zizou, na we wari ukeneye umuhanzi bakorana amwakirana yombi.

Ku ikubitiro Pride yakorewe indirimbo ye ya mbere yise ‘Tasiyana’ yasohokanye n’amashusho yayo.

Reba indirimbo ya mbere Pride yakoze afashijwe na Monster Record

Zizou Alpacino umuyobozi wa Monster Record yasinyishije umuhanzi wa mbere mu buzima bwe
Pride ni we muhanzi mushya wasinye muri Monster Record
Pride yahise asohora indirimbo ye ya mbere yise Tasiyana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .