Dr Dre yashinje uwahoze ari umugore we ubujura

Yanditswe na Uwiduhaye Theos
Kuya 23 Nzeri 2020 saa 05:22
Yasuwe :
0 0

Umuraperi w’umunyabigwi Dr Dre, arashinja uwahoze ari umugore we Nicole Young, gusahura no kwiba sosiyete bari bahuriyeho batarashwana ngo yake gatanya.

Abanyamategeko ba Larry Chatman wafatanyije na Dr Dre gushinga Record One studio mu 2015, bamujyanye mu nkiko bavuga ko aheruka kubikuza $31,457 y’inyongera, kuri konti y’iyi sosiyete kandi atabyemerewe kuko atakiri umugore wa Dr Dre.

TMZ yatangaje ko ngo uyu mugore muri Kanama uyu mwaka, yabikuje agera kuri $ 353 ooo.

Umwunganizi wa Nicole yavuze ko ibi birego bashyize kuri uyu mugore ari gushaka kumuharabika no kugira ngo ibindi nawe yatanze birimo icy’uko hari imitungo yagombaga kuzagabana na Dr Dre nibahabwa gatanya, bitinzwe higwa kuri iki gishya cya Dr Dre n’abo bafatanyije mu bushabitsi.

Umunyamategeko wa Nicole witwa Bryan Freedman yabwiye TMZ, ati “Ni ukugerageza byeruye kwanduza izina rya Nicole, kuko abantu babizi ko banki zidapfa guha abantu amafaranga batemerewe n’amategeko kwakira.”

Nicole Young w’imyaka 50 ku wa 29 Kamena 2020 nibwo yujuje impapuro yaka gatanya. We na Dr Dre bari bamaranye imyaka 24 kuko barushinze ku wa 25 Gicurasi 1996.

Mu minsi ishize uyu mugore yatangaje ko nibura uyu mugabo yajya amuha $2,530,000 buri kwezi yo kwiyitaho no gukora ibindi bintu nkenerwa, mu gihe batarabona gatanya.

Yabitangaje mu mpapuro yashyikirije inkiko avuga ko mu gihe ataratandukana n’umugabo we agomba kujya amufasha kwiyitaho, buri kwezi.

Mu bintu uyu mugore yasabiye aya madorali ya buri kwezi, harimo ayo kwishimisha avuga ko ari $ 900,000, ayo gukora isuku mu muturirwa abamo angana na $10,000 na $ 135,000 y’imyenda mishya azajya agura buri kwezi n’ibindi byinshi.

Aba bombi bafitanye abana babiri barimo umuhungu witwa Truice Young w’imyaka 23 n’umukobwa witwa Truly Young ufite imyaka 19.

Kuva yakuzuza impapuro yaka gatanya, Nicole yatangiye inkundura na Dr Dre, ndetse yanashinje uyu mugabo kuba yaramuhohoteye, avuga ko ibyabo byatangiye kuba nabi muri Mata uyu mwaka, ubwo yamwirukanaga aho babanaga muri Los Angeles. Ubu uyu mugore aba muri Malibu, muri Calfornia.

Nicole Young yuzuza impapuro za gatanya, yavuze ko afite impamvu zitandukanye zitatuma akomeza kubana n’uyu munyabigwi muri Hip hop, wubatse izina no mu gutunganya indirimbo.

Mu minsi ishize uyu mugore yandikiye urukiko asaba kurenganurwa, agaragaza ko ajya kubana na Dr Dre yahatiwe gusinya amasezerano ajyanye n’imitungo yabo n’uko bagombaga kuzayigabana mu gihe baba batandukanye.

Aya masezerano azwi mu cyongereza nka ‘prenuptial agreement’ cyangwa ‘prenup’ mu mpine, arakomeye cyane muri Leta zunze ubumwe za Amerika, kuko mu gihe adahari, iyo habayeho gatanya muri leta zimwe, umutungo rusange w’umuryango abagiye gutandukana barawusatura bakaringaniza.

Dr Dre w’imyaka 55 ufite umutungo ubarirwa muri miliyoni $820, we ntiyabyemeye, ahubwo yavuze ko bagomba kugabana imitungo bagendeye ku biri mu masezerano bagiranye mbere y’uko bakora ubukwe.

Uyu mugore we icyo gihe yavugaga ko ashaka ko bagabana bakaringaniza imitungo irimo n’aka kayabo ndetse n’indi itimukanwa n’ibindi byose by’uyu mugabo.

Ibya Dr Dre n'uwahoze ari umugore we bikomeje kuba agatereranzamba; kuri ubu uyu muraperi yamushinje ubujura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .