Biracyagoranye kumenya igisobanuro nyakuri cy’ijambo ’ibishegu’

Yanditswe na Uwiduhaye Theos
Kuya 13 Ukwakira 2020 saa 10:29
Yasuwe :
0 0

Ku mbuga nkoranyambaga benshi bakomeje kwitana ba mwana ndetse no kutumva ibintu kimwe, biturutse ku ndirimbo ziri gusohoka zikitwa ‘ibishegu’.

Ni ibintu bimaze iminsi bitavugwaho rumwe, abahanzi batandukanye batunzwe agatoki bivugwa ko baririmbye indirimbo zirimo ‘ibishegu’ cyangwa se amagambo aganisha ku busambanyi.

Ijambo ‘ibishegu’ ryabaye inyito y’izi ndirimbo, mu Kinyarwanda rivuze ‘amagambo y’imyanya y’ibanga adakwiriye kuvugirwa ahantu aho ariho hose ku karubanda’.

Mu mashakiro y’imbuga koranyambaga zitandukanye iyo wanditsemo iri ijambo muri iki gihe, haza ibitekerezo byinshi by’abantu batandukanye bamwe bavuga ko koko indirimbo ziri kujya hanze zirimo amagambo y’ibishegu, ariko hakaba n’abandi bavuga ko ntabyo bumvisemo.

Iri jambo ryongeye kugira ubukana mu minsi ishize, ku wa 29 Nzeri 2020, ubwo Umunyamabanga wa Leta muri Minisiteri y’Urubyiruko n’Umuco, Bamporiki Edouard, yavugiraga kuri Radio 10 ko u Rwanda rwagushije ishyano ku bw’aba bahanzi.

Yakomeje avuga ko usibye kuba aba bahanzi bakwimwa uruhushya rwo gukora ibitaramo, yongeyeho ko bakomeje kwiyambura ubufasha ubwo aribwo bwose bakagenewe na Leta.

Ati "Sinshobora kuba ndi muri Minisiteri ngo ishyigikire, itere inkunga umuhanzi wamamaza ubusambanyi, nasezera. Hari ibyo ntashaka ko amateka azambaza.”

Umwera waturutse i bukuru

N’ubwo abahanzi b’ubu bashinjwa kuririmba ubusambanyi, hari n’abatanga ingero nyinshi z’abandi bahanzi ba kera baririmbye ibihangano biganisha ku rukundo rwo mu gitanda ariko ntibitindweho.

Bamwe bavuga ko ari umwera waturutse ku bahanzi bo hambere ahubwo wongeye kubura umutwe muri iki gihe.

Babishingira ku ndirimbo zitandukanye zakanyujijeho nka ‘Kanjogera’ na ‘Rwagihuta’ za Massamba Intore, ‘Mama Munyana’ ya Sebanani n’izindi.

Abahanzi b’ubu ntibazimiza?

Niyomugaba Jonathan, wari ushinzwe kurengera umuco mu majwi n’amashusho mu cyahoze ari RALC, yigeze kubwira IGIHE ko uretse ubutumwa buri gutangwa mu ndirimbo z’abahanzi benshi n’amashusho yabo amwe n’amwe asigaye akorwa mu buryo buhabanye n’umuco.

Ati “Ntabwo guhanga uvuga urukundo rw’abakuru ari ikintu gishya ariko bigira uburyo bikorwamo. Umuhanzi agira umwihariko, kandi burya umuhanzi w’umuhanga ni uzimiza.”

“Umuhanzi agomba kwisanzura ariko akibuka ko abo ahangira bafite umuco n’indangagaciro. Abahanzi basa nk’aho banebwa. “

Ibi ariko ntabwo ariko abahanzi babibona ndetse n’abandi ba hafi mu myidagaduro nka Muyoboke Alex, umunyamakuru Ally Soudy n’abandi benshi.

Nka Davis D, umuhanzi uri mu bagezweho ndetse akaba afite ibihangano byatunzwe agatoki ko biri muri uwo mujyo avuga ko ababazwa n’abantu bamushinja kuririmba ibishegu.

Yagize ati “Njye ntabwo ndirimba ibishegu, ndirimba ibyo abantu bakunda.”

Uyu muhanzi yaburiye abakoresha ibishegu mu ndirimbo zabo, abasaba kujya bagaragaza ikigero cy’abantu bifuza ko bazireba.

Davis D yagize ati “Ku bantu baririmba ibishegu, nushyiraho ibyo bimenyetso bizaba bigaragaza ko hari abafite ikigero cy’imyaka runaka batemerewe kureba izi ndirimbo bitewe n’imyaka bafite.”

Yagaragaje ko abaririmba ibishegu nabo baba bafite abo babigeneye, icyakora bakeneye kubagaragaza kugira ngo hatagira ababangamirwa.

Ati “Igihe ibi bizaba bigezweho, yaba umuhanzi ndetse na sosiyete Nyarwanda, nta ruhande na rumwe ruzaba rubangamiwe kuko abantu bazaba basobanukiwe abagenewe ubutumwa buri mu ndirimbo.”

Davis D yavuze ko inzego zibishinzwe zikeneye gusobanura neza ibishegu bityo ntibikomeze gushyira abakunzi b’umuziki mu rujijo. Ngo bizanabarinda kwitiranya ibihangano by’abo n’ibyitwa ibishegu.

Muyoboke Alex we yabwiye IGIHE ko abantu bavuga ko abahanzi b’ubu batazimiza aribo bafite ikibazo.

Ati “Ni gute umuntu yaririmba ‘igare’ wowe ukumva ibindi? Ni gute umuntu azaririmba indirimbo avuga ko saa Moya yiteguye umukunzi we wowe ugashaka kubisobanura ukundi? Abahanzi b’ubu barazimiza ariko bigendanye n’igihe tugezemo.”

Arongera ati “Nibashaka guca indirimbo bavuga ko zirimo ibishegu bazahere ku za cyera ubwo.”

Ally Soudy wamamaye mu itangazamakuru mu Rwanda nawe abona abavuga ko abahanzi batazimiza aribo bafite ikibazo ubwabo.

Ati “Ntabwo nzi ibyo abantu bita ibishegu. Dushobora kuvuga ku ‘Igare’, ‘Micro’ n’izindi ntabwo numvamo ibishegu. Urugero nka ‘Igare’ iyo wumvise uburyo Mico yaririmbye wumva ari umuntu waririmbye ataka igare. Nta muntu utavuga igare, ntawe utavuga ahamanuka. Ni umuhanzi afite uko abisobanura kandi iyo abivuga wumva nta magambo y’urukozasoni arimo.”

“Umuhanzi arahanga akazimiza, twe twumva indirimbo mu buryo butandukanye bitewe n’ibyo dushaka kumva. Umuntu wumva indirimbo akayijyanisha n’imibonano mpuzabitsina, aba akuze bihagije. Nta mwana wakumva ‘Igare’, ‘Dede’ n’izindi nkazo ngo yumvemo ibishegu.”

Avuga ko niba nta muhanzi wo mu Rwanda urakora indirimbo asomana cyangwa akora ibintu bikorwa by’urukozasoni, nta bishegu biri mu muziki nyarwanda.

Ati “Nta muhanzi wo mu Rwanda ndabona mu ndirimbo asomana, aririmbamo avuga ibitsina mu mazina… ariko hano muri Amerika barabikora. Izo nizo nita indirimbo z’ibishegu. Niba dutekereza ko indirimbo ari igishegu tujye dutegereza igisobanuro cya nyirayo. Gusa nabwira abahanzi ngo ntibazarengere kuko baba batannye.”

Itangazamakuru mu kwenyegeza umuriro

Izi ndirimbo akenshi abanyamakuru nibo bakunze kuvuga ko ari ibishegu ndetse bakanazisesengura, mu buryo bwabo bo bishakiye kurusha ubwo ba nyirazo baziha.

Ibi Muyoboke avuga ko ari ukurengera kuko umuhanzi uba utazi icyo yaririmbye.

Yakomeje ati “Itangazamakuru rigomba kureka ubusesenguzi bwabo ahubwo bakumva ibyo abahanzi baririmbye izo ndirimbo basobanura.”

Abahanzi bakenewe kwigishwa mbere yo guhanwa…

Muyoboke Alex avuga ko abahanzi bakwiriye kubwirwa uburyo bakwiriye kuririmbamo mbere y’uko Minisiteri y’Urubyiruko n’Umuco n’izindi nzego zibashinzwe zihutira kubahana cyangwa se kujya mu itangazamakuru babanenga.

Ati “abahanzi bakwiriye gusobanurirwa uburyo bagomba kuririmbamo kurusha gucirwaho iteka. Leta nivuge ngo dukeneye ko muririmba indirimbo zimeze gutya ariko ireke gushinja abahanzi kuririmba ibishegu.”

Akomeza avuga ko ibi bintu abantu bari kuvuga by’uko abahanzi b’ubu barimo kuririmba ibishegu nta gihe na kimwe bitazabaho kuko ‘nta ngoma itagira ab’ubu’.

Minisiteri y’Urubyiruko n’Umuco nifashe abahanzi aho kubaca intege

Gatsinzi Emery wamamaye muri Hip hop nka Riderman, aherutse gusaba Minisiteri y’Urubyiruko n’Umuco gushyira imbaraga mu gufasha umuhanzi kugera ku rwego mpuzamahanga, kurusha kwita cyane ku guca indirimbo muri iki gihe ziri kuvugwa ko ari ibishegu.

Yabigarutseho mu kiganiro The Versus kuri Televiziyo Rwanda, aho yari yagiye kumurika indirimbo yahuriyemo na Cyusa Ibrahim, bise ‘Umwiza’.

Riderman yavuze ko Minisiteri ikwiye gushyira imbaraga mu gukorana n’ibitangazamakuru mpuzamahanga, kurusha kwita cyane ku guca indirimbo z’abahanzi bashinjwa kuririmba ibishegu.

Yagize ati “Hanyuma ku nzego zidushinzwe nka Minisiteri y’Urubyiruko n’Umuco, aho kugira ngo bajye bafata umwanya bajye ku maradiyo bavuga ngo kanaka yaririmbye ibi, kanaka yagize ibi, nibamere nka RDB, yo irabyuka mu gitondo ikajya gukorana na Alibaba bati ‘nta buryo mwafata ikawa mukaba mwayicuruza hano?’ Ibyo bintu bigacururiza igihugu.”

“Na bo bashobora kugenda bakavugana n’ayo mateleviziyo, bakavuga bati ‘byasaba iki kugira ngo umuziki wacu ujye unyura hano. Cyane cyane ko bimaze kugaragara ko ubwiza bw’amashusho bumaze kuzamuka, ku buryo kuyatambutsa byo ni ibintu byoroshye, [ariko] ikigoranye ni ishoramari.”

Yavuze ko abayobozi bashinzwe abahanzi bakwiye ‘kuva mu biro’ bagakorana na televiziyo mpuzamahanga ngo bazamure agaciro k’umuhanzi Nyarwanda.

Riderman yakomeje ati “Umuhanzi azibwiriza n’ibyo bintu abireke, ahubwo akore ibyo amahanga akeneye kugira ngo ducuruze bininjirize igihugu amafaranga menshi.”

Ibi Riderman abihuza cyane na Ally Soudy. Ati “Muzika Nyarwanda irimo gusohoka nyifata nk’iterambere, kuko muri uyu mwaka navuga ko aribwo twabonye indirimbo nziza cyane mu buryo bw’amajwu n’amashusho. Kare nahoze ndeba ‘Ifarasi’ ya Davis D n’iyitwa ‘Amadeni’ ya Mr Kagame, ndebye uburyo amashusho akozwemo mbona ni nziza cyane.”

Ally Soudy avuga ko ikibazo cy’indirimbo bavuga ko zirimo ibishegu, atari cyo cyakagombye gushyirwa imbere kurusha ibindi kuko hari ibindi byinshi abahanzi bafite bikwiriye kwitabwaho.

Ati “Niba babona izo ndirimbo koko babona izo ndirimbo ari ikibazo, bafite uburyo bagomba gucamo bwiza bakareka kuzisebya. Ku giti cyanjye mbona atari cyo kibazo Leta yakabaye iheraho. Yakabaye ivuga iti bano bantu biremye bakikuza bakagera no ku rwego rwo gufasha benshi twari turi he? Bakwiye gufunguka bagatembera mu bihugu byateye imbere bakareka uko bikora.”

Avuga ko uruganda rw’imyidagaduro rukomeye cyane rukwiye guhabwa agaciro.

Ati “Urugero nka Nigeria, tuyizi kubera abahanzi batandukanye bakomeye. Ariko, u Rwanda abantu baruzi kubera Perezida Kagame ndetse wenda na Meddy na The Ben.”

Zimwe mu ndirimbo zivugwaho kubamo ibishegu

Muyoboke Alex wabaye umujyanama w'abahanzi batandukanye bakomeye mu Rwanda, ntabwo yemeranya n'abavuga ko abahanzi b'ubu batazimiza
Ally Soudy avuga ko nubwo abahanzi bagezweho bavugwaho kuririmba ibishegu, we atari ko abibona
Bamporiki Edouard ni umwe mu bayobozi banenga abahanzi b'ubu, yavuze ko Minisiteri abarizwamo itazigera itera inkunga umuhanzi wese uvugwaho kuririmba ibishegu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .