Ikindi kimenyetso cy’umubano wihariye wa The Ben na Miss Pamella: Ni ishati isa cyangwa barambarana?

Yanditswe na Uwiduhaye Theos
Kuya 20 Ugushyingo 2020 saa 03:39
Yasuwe :
0 0

Umuhanzi Papy John Safari yaririmbye ati ‘Umutima ukunda ntiwihishira, iyo nyirawo yifashe urukundo ruramutamaza!”

Muri iyi ndirimbo aba ashaka kugaragaza ko iyo umuntu yakunze agerageza kubihisha rimwe na rimwe ariko urukundo ntirumukundire, kuko ashiduka byamucitse mu buryo atazi.

Birashoboka ko aribyo biri kuba kuri The Ben bimaze iminsi bihwihwiswa ko ari mu rukundo n’umukobwa witwa Uwicyeza Pamella witabiriye Miss Rwanda mu 2019 akaza mu bakobwa 20 bashakishwagamo Nyampinga w’u Rwanda.

Muri uwo mwaka yabaye Igisonga cya Mbere cya Miss Zuri Africa Queen, irushanwa ryabereye muri Kenya.

Aba bombi guhera umwaka ushize batangiye gukekwa mu rukundo bitewe n’ubutumwa butandukanye, bagiye bashyira ku mbuga nkoranyambaga rimwe na rimwe umukobwa bikamucika akisama yateye imitoma umusore.

Ubu noneho hari kwibazwa niba aba bombi baratangiye kwambarana nyuma y’amafoto ya The Ben, yagiye hanze yambaye ishati irimo amabara y’umweru n’umukara nyuma na Pamella akaza kugaragara mu mafoto ayambaye.

Iyi foto ya The Ben hari hashize ibyumweru 20 ayishyize ku rubuga rwe rwa Instagram yambaye ishati imeze nk’iyo Pamella yashyizeho kuri uyu wa Kane tariki 19 Ugushyingo 2020.

Iyi foto yabanje gushyirwa kuri Instagram story na mukuru wa Pamella witwa Hilton Sonia, na Pamella nyuma aza kuyishyiraho. Ni mu ruhererekane rw’amafoto atandukanye bifotoreje mu rugendo bagiriye muri Tanzania aho bari ubu.

Pamella ukunze kugaragaza amarangamutima ye kuri The Ben, aherutse gushyira hanze ifoto bari kumwe, arangije ayiherekesha amagambo agira ati “Mine” bisobanuye ‘Uwanjye”.

Ku wa 9 Mutarama 2020 ku isabukuru y’amavuko ya The Ben, uyu mukobwa yashyize ifoto y’uyu muhanzi kuri Instagram, arangije agira ati "Uri umunyamutima mwiza, ugira urukundo, uri uwo kwizerwa ndetse umutima wawe ni munini kukurusha. Imana ihe umugisha undi mwaka wawe.”

Mu kiganiro IGIHE yagiranye na Uwicyeza kuri uyu wa Kabiri tariki 17 Ugushyingo, yabajijwe icyihishe inyuma y’umubano we na The Ben, aryumaho.

Ati "Ni ubuzima bwite bw’umuntu, ndumva nta kirenze nabivugaho. Ni ibisanzwe, nta mpamvu yo kubitindaho. Iyo umuntu adashaka kuvuga ikintu ntabwo aba agishaka kandi nta n’ikintu byabamarira. Ni ugutegereza igihe nikigera, ibyo mugomba kumenya muzabimenya."

Uwicyeza Pamella w’imyaka 21, yasoje amashuri yisumbuye mu bijyanye n’Amateka, Ubukungu n’Ubumenyi bw’Isi (HEG) kuri APADE ku Kicukiro. Ateganya gutangira kwiga kaminuza mu mwaka utaha.

The Ben we yavukiye i Kampala ku wa 9 Mutarama 1988. Ni umwe mu bahanzi bafite izina rikomeye mu muziki w’u Rwanda no mu karere muri rusange.

Ifoto ya The Ben yambaye iyi shati imaze ibyumweru 20
Iyi shati yongeye gutuma benshi bakeka ko The Ben na Uwicyeza Pamella baba bafitanye umubano wihariye
The Ben niwe wabanje gushyira hanze amafoto yambaye iyi shati
Uwicyeza Pamella yajyanye ishati isa nk'iya The Ben mu rugendo rwe muri Tanzania
Uwicyeza (ubanza iburyo) yambaye ishati isa nk'iyo The Ben yigeze kwifotoza yambaye
Pamella akunze kwita The Ben uwe
The Ben ajya anyuzamo gake agashyira ku mbuga nkoranyambaga uyu mukobwa
The Ben amaze igihe ari mu Rwanda ari nabwo yatangiye kuvugwa cyane mu mubano na Uwicyeza
The Ben na Uwicyeza hashize iminsi hajya hanze amafoto bari kumwe
Uwicyeza aherutse kugaragaza ko akunda inseko ya The Ben mu buryo bukomeye
Uwicyeza bivugwa ko yaba akundana na The Ben mu ibanga
Uwicyeza ntajya ahisha amarangamutima ye kuri The Ben
Iby'umubano w'aba bombi akenshi biteza urujijo
Iby'umubano wa The Ben na Uwicyeza bikomeje kuvugisha benshi ku mbuga nkoranyambaga
Iyo Pamella ari kumuvugaho ararambukirwa

The Ben aheruka gusohora indirimbo "Umutoso" yahuriyemo na Muchoma


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .