Intandaro y’amahari yari hagati ya Tupac na Jay Z

Yanditswe na Uwiduhaye Theos
Kuya 23 Nzeri 2020 saa 02:09
Yasuwe :
0 0

Abakurikirana umuziki cyane cyane uwa Hip Hop muri Amerika bazi ko umuraperi 2Pac [Tupac Amaru Shakur] na mugenzi we The Notorious B.I.G [Christopher George Latore Wallace], barinze bapfa mu myaka ikurikirana mu 1996 no mu 1997 batajya imbizi.

Uyu mwiryane hagati y’aba basore bose bari mu kigero kimwe cyane ko Tupac yavutse mu 1971 mu gihe Notorious we ari mu 1972, wari waraturutse ku bwumvikane buke bwari hagati y’abahanzi n’abafana ba Hip Hop bo mu East Coast bari barangajwe imbere na The Notorious B.I.G. na label ye yo muri New York yitwaga Bad Boy Records.

Ndetse, n’abandi bo muri West Coast bari barangajwe imbere na Tupac Shakur ndetse na label ya Suge Knight yakoreraga i Los Angeles yitwa Death Row Records ari nayo Tupac yabarizwagamo.

Uyu mwiryane hagati ya Tupac na Notorious, wari wararenze umuziki ku buryo iyo bahuriraga mu gitaramo cyangwa ahandi bafatanaga mu mashati bagakizwa na mbuga.

Mu ndirimbo ho byari nk’ikizira kuba umwe yayikora akarangiza adatutse mugenzi we ibitutsi biremereye birimo n’ibiganisha ku babyeyi.

Byageze naho ku wa 13 Nzeri 1996 Tupac araswa bikamuviramo gupfa; bamwe mu baketswe kuba inyuma y’uru rupfu harimo na Notorious gusa abo mu muryango we ndetse n’abari abajyanama be babyamaganiye kure bavuga ko uyu musore yari ari i New York ari gukora indirimbo. Gusa nawe, ku wa 9 Werurwe 1997, yarasiwe i Los Angeles, arapfa.

Igitangaje, kugeza na n’ubu aba basore bombi uwabishe ntabwo aramenyekana.

Kuba batarajyaga imbizi byagiye bigira ingaruka ku bandi bahanzi batandukanye kuko nka Jay Z, yagiranye amakimbirane akomeye na Tupac biturutse gusa ku kuba yarakoranye indirimbo na Notorious.

Nk’uko umwe mu batangije Murder Inc Records, Irv Gotti, yabitangaje mu kiganiro yagiranye na Fat Joe kuri Instagram, ngo Tupac yatangije inkundura kuri Jay Z nyuma y’uko uyu muhanzi yari yakoranye indirimbo na Notorious bise “Brooklyn’s Finest” yari iri kuri album ya Jay Z yise ‘Reasonable Doubt’ yagiye hanze mu 1996.

Muri iyi ndirimbo B.I.G yumvikanamo agace gato yibasira Tupac. Ibi byatumye uyu muraperi wubatse amateka, agira ubwoba bw’uko Jay-Z yaba agiye kujya akorana na Notorious, maze mu ndirimbo zakurikiyeho uyu muraperi yakoze, atangira kumwibasira.

N’ubwo Tupac mu ndirimbo zakurikiye iyi Jay Z yakoranye na Notorious, yakunze kumwibasira, Jay Z yahisemo kuruca ararumira cyane ko uyu mugenzi we mu 1996 yahise yicwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .