Lous and The Yakuza, undi Munyarwanda umaze kwamamara mu muziki ku ruhando mpuzamahanga

Yanditswe na Uwiduhaye Theos
Kuya 14 Ukwakira 2020 saa 10:31
Yasuwe :
0 0

Nyuma y’abandi bahanzi bamaze kubaka izina ku ruhando mpuzamahanga barimo Stromae, Gaël Faye, Corneille Nyungura n’abandi benshi, Lous and The Yakuza ni irindi zina riri kumvikana neza mu ruhando mpuzamahanga mu muziki.

Uyu mukobwa w’imyaka 24 ubusanzwe witwa Marie Pierre Kakoma, afite izina rimaze kumenyekana cyane ku ruhando rwa muzika mpuzamahanga cyane cyane mu bihugu bikoresha uririmi rw’Igifaransa.

Ubusanzwe ni umuririmbyi, umwanditsi w’indirimbo, umuraperi akaba n’umurika imideli. Avuka kuri se wo muri Repubulika Iharanira Demokarasi ya Kongo na nyina w’Umunyandakazi.

Yavukiye i Lubumbashi muri RDC mu 1996. Icyo gihe ababyeyi be bari bafite izina rikomeye mu kuvura muri icyo gihugu, aho se yari umuhanga mu bijyanye no kwita ku bagore bibarutse mu gihe nyina yari umuhanga mu byo kuvura abana.

Bitewe n’ibibazo by’intambara byabaye muri iki gihugu, mu 2000 umuryango we wimukiye mu Bubiligi afite imyaka ine ariko se asigara muri icyo gihugu.

Mu 2005 bavuye mu Bubiligi bafata icyemezo cyo gutura mu Rwanda mu Mujyi wa Kigali ari naho nyina akomoka, baza kuhava mu 2011 basubira i Burayi.

Uyu mukobwa yamamaye cyane mu ndirimbo zirimo ‘Dilemme’ yagiye hanze muri Nzeri 2019, ‘Tout est gore’ yasohotse mu Ukuboza 2019 ndetse na ‘Solo’ yagiye hanze muri Werurwe 2020. Ari gutegura album ye yise ‘Gore, yakozwe na El Guincho biteganyijwe ko izajya hanze hagati ya Nzeri na Ugushyingo 2020.

Lous yatangiye kwiyumvamo umuziki akiri muto bitewe na se wakundaga abahanga mu muziki wo hambere nka Mozart, Chopin, Vivaldi na Beethoven.

Impano ye yavumbuwe bwa mbere n’umujyanama we ubu, Miguel Fernandez, nyuma yo kubona ibihangano bye kuri internet.

Mu ntangiriro za 2017 uyu mukobwa afatanyije n’inshuti ze batangije band yaririmbaga mu tubari i Bruxelles mu Bubiligi. Muri uwo mwaka urangira yatumiwe gucuranga muri La ChillZone, nyuma yo gusinya amasezerano muri Columbia Records binyuze muri Sony Music yo mu Bufaransa.

‘Dilemme’ ifatwa nk’indirimbo yamufunguriye amarembo ku ruhando mpuzamahanga, yagiye hanze muri Nzeri umwaka ushize, yakozwe na El Guincho na Ponko. Yakinwe inshuro zirenga miliyoni 10 kuri Spotify ndetse imaze kurebwa miliyoni zirenga esheshatu kuri Youtube.

Umuziki wa Lous and The Yakuza wibanda ku njyana zirimo uruhurirane rwa Trap, R&B, na pop.

-  Bimwe mu bihangano bya Lous and The Yakuza

Lous and The Yakuza ni umwe mu bahanzi bagezweho ku ruhando mpuzamahanga bakomoka mu Rwanda
Uyu mukobwa ahanzwe amaso ku muziki w'i Burayi cyane cyane mu bavuga Igifaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .