Umutoni Belise arifuriza impanga ye ikamba rya Nyampinga w’u Rwanda

Yanditswe na Munyengabe Murungi Sabin
Kuya 20 Gashyantare 2018 saa 12:40
Yasuwe :
0 0

Uwonkunda Belinda na Umutoni Belise, abakobwa babiri b’impanga bamenyekaniye mu irushanwa rya Nyampinga uyu mwaka, umwe yabashije kugera mu cyiciro cya nyuma mugenzi we arasigara.

Umutoni Belise wabuze amahirwe yo kugera ku musozo w’irushanwa yabwiye IGIHE ko yababaye cyane, ariko ngo inzozi ze ntizarangiye kuko impanga basangiye amaraso izabikora.

Yagize ati “Icya mbere byarambabaje ko ntakomeje kuko nifuzaga kugera kure, umuvandimwe wanjye Belinda yarakomeje byanteye kumva ko bitarangiye burundu kandi ni ishema ndetse ndamushyigikiye kandi umuryango wose tumuri inyuma.”

Aba bakobwa bombi baheruka gukora agashya, Belise yagiye gusura impanga ye mu mwiherero i Nyamata bakibonana barahoberana bararira. Yavuze ko yumvaga amerewe nabi mu mubiri ku bwo kumara igihe kinini atabona impanga ye.

Yagize ati “Ni njye wabisabye, numvaga maze kumera nabi. Ntabwo nari nzi ko iyo abakobwa bageze mu mwiherero babambura telefone ntibavugane n’abo hanze, ntabwo nari niteguye ko nzamara igihe kingana gutya ntavugana na we. Nyuma nibwo nabisabye ngira Imana banyemerera kubonana na we.”

Umutoni Belise yasobanuye ko icyamuteye kumererwa nabi muri we ngo ni ukumara igihe kinini atabona kandi atabasha kuvugisha umuvandimwe we ibintu atigeze amenyera kuva bavuka.

Yagize ati “Nk’impanga twari dusanzwe dukorana ibintu byose, umunota ku wundi nabaga nzi uko ameze nanjye akamenya uko meze bityo nkumva ndaruhutse. Bagiye mu mwiherero rero byarananiye urumva nari maze iminsi itanu yose ntabonana na we tutanavugana numva merewe nabi.”

Ubwo bari mu mashuri yisumbuye, umwe yigaga mu Karere ka Nyanza undi akiga i Muhanga; basuranaga kenshi mu buryo bwo guhanahana amakuru no gusangira ubuzima bamenyereyemo nk’impanga kugira ngo hatagira uwicisha undi irungu.

Nyina w’izi mpanga ngo yatunguwe bikomeye n’uko zitwaje mu majonjora y’ibanze ndetse ngo yatangiye kugira icyizere ko Uwonkunda Belinda ashobora kuzatungurana akagirwa Nyampinga w’Igihugu.

Yagize ati “Mama byaramutunguye, aho twageze yabonye ari kure ku buryo ubu ashyigikiye cyane Belinda. Mu rugo akunze kuba arimo kutuganiriza akanatugira inama z’uko dukwiye kwitwara, arifuza cyane ko bamugira Nyampinga w’u Rwanda agahesha ishema umuryango wacu.”

Umwihariko azi ku mpanga ye…

Yagize ati “Belinda azatsinda, na mbere hose yari umuhanga kundusha. Ni umukobwa ufite ubuhanga, afite ubwiza kandi n’ibindi byose arabigaragaza. No gutambuka neza Belinda arabizi kuko asanzwe akora ibyo kwerekana imideli, ni ibintu amenyereye ku buryo nzi neza ko azitwara neza akaba yatsinda.”

Umutoni Belise yasabye abantu bari basanzwe bashyigikiye impanga zombi muri Miss Rwanda gukomeza gushyigikira Belinda. Yagize ati “Abari badushyigikiye twembi bakomeze bamufashe.”

Uwonkunda Belinda n'impanga ye Belise bombi baserukiye Umujyi wa Kigali muri Miss Rwanda

Yongeyeho ati “Ikindi, impamvu abantu bakwiye gushyigikira Belinda, ni umukobwa ufite ubwiza akaba anafite ubuhanga ku buryo aramutse atowe mpamya neza ko yazahagararira igihugu cyacu neza.”

Uwonkunda Belinda, afite imyaka 22, akareshya na metero 1.70 apima ibiro 50, impanga ye Umutoni Belise baranganya imyaka n’uburebure gusa bagatandukanira ku biro kuko uyu apima ibiro 51.

Izi mpanga ziheruka gusoza amashuri yisumbuye mu ishami rya MEG [Imibare, Ubukungu n’Ubumenyi bw’Isi]. Aba bombi basanzwe bakora ibyo kwerekana imideli bakaba batuye i Remera.

Uwonkunda Belinda yatunguranye, ubu ni we uri imbere mu itora ryo kuri telefone
Uyu mukobwa yavanye Ndahiro Liliane ku mwanya wa mbere yari amazeho igihe kigera ku kwezi
Ubwo Umutoni Belise aheruka gusura impanga ye mu mwiherero barahuye bararira
Umutoni Belise arifuriza impanga ye ikamba rya Nyampinga w’u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .