Urunturuntu mu rukundo rwa Cardi B na Offset, bashobora no gutandukana

Yanditswe na Uwiduhaye Theos
Kuya 16 Nzeri 2020 saa 09:07
Yasuwe :
0 0

Umuraperikazi Belcalis Marlenis Almanzar umaze kwamamara nka Cardi B arashaka gutandukana n’umuraperi Kiari Kendrell Cephus uzwi nka Offset mu itsinda rya Migos, bari bamaze imyaka itatu babana ndetse babyaranye umwana w’umukobwa, banasezeranye kubana akaramata.

Cardi B yatanze impapuro zaka gatanya mu rukiko rwo muri Georgia kuri uyu wa Kabiri tariki 15 Nzeri 2020.

Aba bombi bari basezeranye kubana akaramata ku wa 20 Nzeri 2017. Cardi B yari yaririnze kubitangaza kugeza igihe yendaga kwibaruka umwana w’umukobwa.

Umubano wabo wagiye uzamo agatotsi kenshi ndetse Cardi B yagiye ashinja uyu mugabo we, kumuca inyuma kandi babana.

Mu 2019, yabwiye Vogue ati “Igihe njye n’umugabo wanjye tugiye mu bibazo byacu, urabizi yanciye inyuma, ariko nahisemo kumuguma iruhande ndetse tugakorana. Abantu benshi barandakariye, abagore benshi bamfashe nk’uwabatengushye ariko ni bwo buzima nyabwo.”

Arongera ati “Iyo ukunda umuntu ukarekera kumuba iruhande urahangayika kandi imbuga nkoranyambaga zikakubwira ngo reka kuvugana n’uwo muntu kuko yaguciye inyuma, ntabwo uba wishimye mu mutima kugeza igihe muganiriye.”

Urukundo rwa Cardi B na Offsett ni hasi hejuru…
Mu 2018 nabwo Cardi B usanzwe afitanye umwana w’umukobwa n’uyu wari umugabo we; bise Kulture Kiari Cephus yari yatangaje ko atagishoboye kwihanganira kubana na Offset, ndetse avuga ko batandukanye.

Ati “Akenshi nageragezaga kugira ngo mu rukundo bibe byiza n’umubyeyi w’umwana wanjye ariko bikaba iyanga. Ubu turi inshuti zisanzwe kandi murabizi ko dukorana neza mu by’ubucuruzi. Azakomeza amvugishe kenshi kandi rwa rukundo rwacu tuzarukomeza gusa ibintu ntibyagendaga neza hagati yacu mu gihe kinini gishize, gusa ntawe ufite ikosa.”

Uyu mugore w’imyaka 27 yakomeje avuga ko yageze aho akabona urukundo rwabo rutagishobotse ndetse ubu bakaba batakiri kumwe. Asoza ati “Sinzi igihe bizatwara ngo tubone gatanya yemewe gusa nzakomeza kumukunda urukundo rwinshi nka se w’umwana wanjye.”

Icyo gihe umubano w’aba bombi wazambye nyuma y’aho TMZ, yahishuye amashusho ya Offset ari kwishimana n’umukobwa witwa Summer Bunni.

Ubwo Offset yizihizagaho isabukuru ye, yanditse ku rubuga rwa Instagram atakambira Cardi B, avuga ko yifuza kuzamara ubuzima bwe bwose ari kumwe n’uyu mugore banabyaranye.

Ati “Ndifuza kuba namara igihe cyose nsigaje ku Isi ndi kumwe nawe. Umbabarire ku byo nakoze ntabwo nigeze nsambana n’uriya mukobwa gusa naramushimishaga; urumva icyo mvuga? Ndasaba imbabazi kuko ndagukunda. Ndizera ko wambabariye! Icyo nifuza ku isabukuru yanjye ni uko wangarukira.”

Nyuma baje kongera guhuza imitima urukundo rwabo rurabobera, bari bamaze igihe babanye neza ndetse mu bitaramo bitandukanye byabaye mbere y’uko icyorezo cya Covid-19 cyugariza Isi, babaga bari kumwe bafatanye agatoki ku kandi.

Cardi B yavukiye muri Leta Zunze Ubumwe za Amerika, mu gace ka The Bronx muri leta ya New York, tariki 11 Ukwakira mu 1992.

Yatangiye kumenyekana cyane mu 2015 ubwo yafatanyaga n’icyamamare mu njyana ya Reggae, Shaggy na Popcaan bagasubiramo indirimbo yise Boom Boom. Hari n’iyakunzwe yahuriyemo na Offset bise ‘Clout’.

Ubu agezweho mu ndirimbo yitwa ‘Wap’ yahuriyemo na mugenzi we w’umuraperi ugezweho muri Amerika witwa Megan Thee Stallion.

Urukundo rw'aba bombi rukunze kuzamo agatotsi bakongera bagasubirana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .