kwamamaza
Ni iki cyateye Lil G gusaba Mavenge ngo bakorane indirimbo?

Ni iki cyateye Lil G gusaba Mavenge ngo bakorane indirimbo?


Yanditswe kuya 21-10-2013 - Saa 21:07'

Harageze ko umuhanzi aririmbana n’uwo yemeraga mu bwana bwe kuko nyuma y’aho tuboneye Just Family isubiranamo indirimbo na Jean Paul Samputu, Abahanzi bibumbiye muri Kina Music nabo bakifatanya na Muzee Makanyaga, ubu Lil G nawe yabigezeho akoranye indirimbo na Mavenge Sudi.

Indirimbo “Gakoni k’abakobwa” ya Mavenge Sudi w’imyaka 45, niyo umuhanzi Lil G w’imyaka 19, yafatanyije na nyirubwite bayisubiranamo.

Lil G avuga ko yakunze iyi ndirimbo kuva agifite imyaka itatu gusa.

Aganira na IGIHE Lil G yatangaje zimwe mu mpamvu zatumye ari we ahitamo mu bahanzi b’indirimbo za karahanyuze.

Ati: “Kuva mfite imyaka itatu nibwo natangiye gukunda indirimbo “Gakoni k’abakobwa. Nayumvaga umukozi wo mu rugo ayiririmba ubwo twajyanaga ku ishuri, ntangira kuyikunda kugeza n’ubu ubwo dukoranye iyi ndiririmbo, kuko nabyo nabyifuje.”

Indirimbo “Gakoni k’abakobwa (isubiwemo)”, Lil G avuga ko izaba iri mu zigize Album ye ya Kabiri yitegura kumurika mu Kwezi kw’Ukuboza uyu mwaka wa 2013.

Ati: “Namaze igihe kinini nifuza gukorana na we, ariko ntibyanshobokera bitewe nuko yabaga afite gahunda nyinshi ariko kandi najye simbashe guhita mbona akanya kubera ikizamini cya Leta nitegura gukora uyu mwaka.”

Mavenge avuga ko gukorana na Lil Byamworoheye ndetse biramushimisha cyane

“Lil G ni umwana uririmba indirimbo zisobanutse, zifite agaciro, bigaragara ko mu magambo ye no mu bitekerezo bye, ubona ko afite icyerekezo cyiza mu muziki we, kuko no muri iyi ndirimbo dukorana ntabwo yigeze angora.”

Mavenge akomeza avuga ko mu gihe bari muri studio batunganya iyi ndirimbo, byari byiza cyane bitewe n’ubuhanga no kumva neza bya Lil G.

Ati: “Namubwiraga amagambo mbona akwiye kuba yakoreshwa mu ndirimbo, n’ayo twahindura muyo yari yanditse, nkabona nawe arabyumva akanabyemera. Ku bw’ibyo nasanze ari umwana wumvira ku buryo azagera kure mu muziki we.”

Ku kuba iyakozwe ishobora kuba yatesha ireme iyari isanzwe, Mavenge avuga ko nayo ari indirimbo nziza cyane kandi ikoranye ubuhanga.

Iyi ndirimbo irangwa n’injyana iganisha cyane mu mudiho wa Kinyarwanda, ndetse ikaba inifitemo uburyohe bw’umuziki ugezweho.

Amashusho y’iyi ndirimbo nayo ngo ari bugufi kuba yakorwa, kandi ngo bitabaye ibyanga bumvaga bifuza ko yazafatirwa mu Rukari nk’ahantu hakirangwa bimwe mu bigize umuco wa Kinyarwanda.

Lil G, asanzwe amenyerewe mu ndirimbo ze nyinshi zamenyekanye kenshi mu njyana igezweho nka; Agaciro, Umuntu, Imbabazi, Ndagushimira, n’izindi.

Naho Mavenge Sudi watangiye gukaraga imirya ya gitari kuva mu myaka ya za 1980 zihera, we yamenyekanye cyane mu ndirimbo zakunzwe kakahava nka; “Gakoni k’abakobwa, Ku Munini, n’izindi

Lil G umuhanzi wo muri iki gihe
Mavenge Sudi umuhanzi nyarwanda wo hambere
IBITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!