Impinduka muri Kiliziya Gatolika: Abagore bongerewe inshingano kuri Alitari

Yanditswe na Akayezu Jean de Dieu
Kuya 12 Mutarama 2021 saa 12:42
Yasuwe :
0 0

Kiliziya Gatolika ku Isi yakoze impinduka mu mategeko yari asanzweho yakumiraga abagore gukora zimwe mu nshingano zo kuri Alitari, bahabwa uburenganzira busesuye bwo kuba basoma amasomo ya Misa no gutanga Ukarisitiya mu buryo bwemewe kandi burambye.

Ubusanzwe mu gitambo cya misa cyangwa se mu muhimbazo w’ijambo ry’Imana [Liturgia], habaho gusoma amasomo umuntu asomera ikoraniro. Ibyo bikenera abantu babitojwe, babyiteguye, bazi agaciro k’ijambo ry’Imana kandi bashobora kurisomera abateze amatwi ubutumwa Imana ibafitiye.

Ikindi mu gitambo cy’Ukarisitiya, abahereza babaga ari abana akenshi mu gihe abakuru bahereza mu gihe cyo gutanga Ukarisitiya bagafasha Umusaseridoti watuye igitambo cya Misa.

Abafashaga mu gihe cyo gutanga Ukarisitiya ni abagabo, mu gihe abagore babikoraga babiherewe uruhushya rw’igihe gito. Nk’urugero umugore yahabwaga uruhushya rw’uwo munsi cyangwa urw’igihe kitarenze imyaka itatu gishobora kuvugururwa.

Ubundi izi nshingano mu buryo burambye zahabwaga abanyeshuri muri Seminari biteguraga kuba abapadiri, bivuze ko cyari igice kibanziriza kuzahabwa ubaseseridoti. Ibi bihita byumvikana kubera ko nta mugore wemerewe kuba umupadiri ko mu buryo burambye izi nshingano zahabwaga abagabo.

Umushumba wa Kiliziya Gatolika ku Isi, Papa Francis ku wa Mbere tariki 11 Mutarama 2021, yatangaje impinduka zirimo ko abagore bagiye kujya bahabwa izi nshingano mu buryo burambye gusa ashimangira ko kugeza ubu nta mugore wemerewe kuba ‘Umupadiri’.

Ubusaseridoti buri amoko abiri, aho hari ubwitwa ‘Nyobozi’ buhabwa abagabo [Ni urugero rwa Yezu Kristu], n’Ubusaseridoti bwa rusange kuko abakristu babatijwe bose binjira mu muryango wa ‘Gisaseridoti’.

Papa Francis yavuze ko izi mpinduka zakozwe hagamijwe “Kuzirikana umusanzu abagore basanzwe batanga muri Kiliziya, anashimangira ko Abakiristu Gatolika bose babatijwe bagomba kugira uruhare mu iyogezabutumwa.”

Mu Rwanda bakiranye yombi izi mpinduka

Papa Paul VI wayoboye Kiliziya Gatolika ku Isi kuva mu 1963, nibwo yatangije impinduka zemerera abagore kugira imirimo imwe n’imwe ya Liturgia bakora.

Nyuma ye abamusimbuye bagiye bashyira abagore mu nzego zifata ibyemezo muri Kiliziya ariko bikagarukira aho gusa. Muri izo nzego harimo nk’urwego rucunga umutungo wa Kiliziya aho umubare w’abagore urimo uri hafi kungana n’Aba-cardinal babarizwamo.

Mu kiganiro yagiranye na IGIHE, Arikiyepisikopi wa Kigali Musenyeri Antoine Cardinal Kambanda yavuze ko bishimiye icyemezo cyafashwe na Papa Francis.

Yavuze ko bizafasha cyane mu iyogezabutumwa kuko nko mu Rwanda, Abalayiki [Abemeramana Gatolika] muri iki gihe cya guma mu rugo nibo batozaga abana isengesho, bakayobora umuhimbazo w’ijambo ry’Imana mu rugo n’ibindi.

Antoine Cardinal Kambanda avuga ko “Urumva rero Abalayiki bararushaho kugenda bayobora Liturgia, mu rugo niho umwana amenyera Imana, isengesho no kwizera Imana no kuyiragiza. Ibyo abihabwa n’ababyeyi, mbese Kiliziya ishingiye mu rugo, niho ihera.”

Kiliziya Gatolika mu Rwanda ivuga ko Abalayiki bari mu Nama ya Paruwasi, aribo bayobora inama ncungamutungo ya Paruwasi, ‘nibo bayobora za Centrale, nibo bategura abana bazabatizwa n’abageni bazashyingirwa.’

Antoine Cardinal Kambanda yakomeje agira ati “Papa Francis ashaka ko Abalayiki bagira uruhare mu buzima no mu bikorwa bya Kiliziya kugira ngo dushobore kwegera Abakristu kurushaho. Niba hari nk’umurwayi ukeneye Amasakaramentu ntabwo Padiri ashobora kubageraho bose, abo Balayiki rero baramufasha.”

Yakomeje agira ati “Kubihererwa ubwo bubasha bizagenda bituma abantu benshi barushaho kwamamaza ijambo ry’Imana kurushaho. Tukaba dushimira Papa Francis.”

Mu gitabo cy’amategeko ya Kiliziya, “le droit canon”, mu itegeko rya 1024 havugwamo ko umuntu w’igitsinagabo wabatijwe, wenyine “niwe ushobora kuba umudiyakoni, umupadiri n’umusenyeri mu buryo bwemewe”.

Mu muco wa Kiliziya bisa nk’ikizira kuba umugore yashaka kuba padiri, gusa ntibibuza ko mu bice bitandukanye by’Isi hatangiye kuvuka amahuriro y’abantu basaba ko abagore bakwemererwa kuba abapadiri nubwo biri kure nk’Ukwezi.

Iyo abantu bavuga ku kuba abagore baba abapadiri, hagaruka cyane no ku mwanya uyu munsi bafite muri Kiliziya Gatolika, uwo bari bafite kuva kera mu ntangiriro za kiliziya watumye bataba abapadiri n’ibindi.

Muri Bibiliya havugwamo abagore bagiye bakora imirimo ikomeye ndetse bamwe bagereranya no kuba yararushaga kuba baba ‘abapadiri, ariko nanone abantu benshi bakamagana ibyo bashingiye ku kuba mu ntumwa 12 za Yezu nta mugore n’umwe wari urimo.

Abize Tewolojiya basesengura iyi ngingo mu buryo butandukanye, ariko benshi bagahuriza ku kuba Yezu yaratumye Mariya Madalena kujya gutangaza inkuru y’izuka rye, bifite uburemere kurusha kuba yari yaratoranyije intumwa ze 12 z’abagabo kuko iyamamazabutumwa ryatangiye inyuma y’izuka rye.

Abagore bongerewe inshingano muri Kiliziya Gatolika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .