Hatanzwe amahirwe ku banyarwanda barenga 100 bashaka kwiga muri Turikiya

Ikigo gifasha abanyeshuri gushaka amashuri yo hanze y’igihugu, Best World Link Group cyatangaje ko kigiye gufasha abanyeshuri b’abanyarwanda barenga 100 kubona buruse zo kwiga muri Turikiya, zishyura ijana ku ijana.

Abanyeshuri bemerewe gusaba izo buruse ni abagize amanota ari hejuru ya 20 kuri 60 ku bize amashuri y’Imyuga n’Ubumenyi ngiro (WDA) cyangwa hejuru ya 30 kuri 73 ku bize mu bigo bigengwa n’Ikigo cy’igihugu cy’Uburezi (REB).

Buruse zizatangwa mu masomo y’Ubucuruzi (Business), imicungire y’amahoteli (Hotel Management), ubuvuzi bw’amatungo (Veterinary sciences), Engineering no gukora porogaramu za mudasobwa, gutunganya filimi, imideli n’Ubuvuzi bw’abantu (Medecine) harimo Ubuforomo na Farumasi.

Umuyobozi wa Best World link, Rukundo Charles Jyenani yavuze ko izo buruse zigenewe abanyeshuri bakoze ibizamini bisoza amashuri yisumbuye mu 2019.

Ati “Turasahaka kumenyesha abana b’abanyarwanda, bakoze ibizamini muri 2019 by’amashuri yisumbuye muri WDA na REB. Tubafitiye buruse zo muri Turikiya bisaba, abana bo muri WDA kuba barabonye amanota 20 kuzamura cyangwa muri REB kuba barabonye 30 kuzamura.”

Mu gusaba buruse, umunyeshuri asabwa indangamanota z’imyaka itatu, iy’uwa Kane, uwa Gatanu n’uwa Gatandatu y’amashuri yisumbuye, diplôme na pasiporo, ubundi akegera Best World Link aho ikorera kuri gare yo mu mujyi wa Kigali izwi nka Down Town, bakamufasha.

Abazatsindira kwigira kuri izo buruse bazatangira kwiga muri Nzeri uyu mwaka.

Kuva mu 2017 ubwo Best World Link yatangiraga, imaze kohereza mu bihugu bitandukanye abanyeshuri barenga 300.

Uwakenera kugira ibindi amenya yakoresha telefoni 0788167100, 0789460393 cyangwa 0786576293. Ashobora no gukoresha email [email protected] cyangwa agasura urubuga www.bestworldlink.co.uk.


Special pages
. . . . . .