Abashyigikiye Rusesabagina biyita ko baharanira ubwisanzure na demokarasi baramwaye

Yanditswe na Mushimire Olivier
Kuya 22 Nzeri 2020 saa 08:20
Yasuwe :
0 0

Ikibazo cya Rusesabagina ni urugero rw’uburyo abanyamahanga mu bihugu by’u Burayi na Amerika bivanga muri politiki z’ibindi bihugu bitwaje kuba ’impirimbanyi z’ubwisanzure na demokarasi’, nyuma bagahinduka abafatanyacyaha mu bikorwa byo gutera inkunga iterabwoba.

Nyuma y’ifatwa rya Rusesabagina akagaragarizwa itangazamakuru ku wa 31 Kanama 2020, igikuba cyacitse mu bambari ba Rusesabagina n’abasanzwe bamukingira ikibaba, maze abiyita ko baharanira ubwisanzure na demokarasi bo muri Leta Zunze Ubumwe za Amerika barasizora, basaba ko ahita arekurwa, ku buryo umuntu yakwibaza niba batari batewe ubwoba n’uko ashobora kuburana yemera ibyaha, maze akamena amabanga bafitanye, bagakorwa n’ikimwaro.

Mu by’ukuri, urebye uko abashyigikiye Rusesabagina n’abambari be bakubitaga epfo na ruguru mu itangazamakuru bamagana ifatwa rye, kandi basaba ko arekurwa, umuntu ntiyabura kwibaza ikibyihishe inyuma; nta gushidikanya ko hari isano hagati y’ibikorwa by’iterabwoba bya Rusesabagina n’imigambi y’abanyamahanga biyita ko baharanira demokarasi n’ubwisanzure mu Rwanda.

Abanyamahanga bashyigikiye Rusesabagina n’abambari be bakimara kumva ko yuriye iriya ndege imuganisha i Kigali, ubusanzwe bagombaga gukurayo amaso, bagategereza ubutabera, kuko batayobewe ibyaha aregwa yakoze ku mugaragaro, n’ibimenyetso byuzuye ku karubanda.

Ariko mu miterere y’abo banyamahanga biyita ko baharanira ubwisanzure na demokarasi, ntabwo bajya bashimishwa no kumva ko imigambi yabo yapfubye; ndetse iyo binabaye, aho kwemera amakosa yabo ngo bazibukire, batangira gukwiza ibihuha no gutunga intoki abandi, nko kuvuga ko Perezida Kagame arimo gufata amahanga nk’injiji mu kibazo cya Rusesabagina.

Nk’uko bivugwa n’abo banyamahanga bo ku migabane y’u Burayi na Amerika biyita ko baharanira ubwisanzure na demokarasi, Rusesabagina ni inzirakarengane, naho Leta y’u Rwanda ikaba ariyo ikwiye kujyanwa mu butabera. Kuri abo banyamahanga bigize imboni za Afurika, ikosa rya Guverinoma y’u Rwanda ni uko yabangamiye ibyo bita "ibikorwa bya politiki" bigamije kubohora abaturage b’u Rwanda by’umutwe witwara gisirikare wa MRCD/FLN byatangijwe mu 2018, nk’uko byatangajwe na Paul Rusesabagina mu ijambo yavuze yifuriza abambari be umwaka mushya wa 2018.

Uretse n’ibyo, kuva ku munsi Urwego rw’Ubugenzacyaha (RIB) rwatangarije ko Rusesabagina yafashwe, ibinyamakuru byinshi by’i Burayi na Amerika, ku bufatanye n’abiyita ko baharanira ubwisanzure na demokarasi n’abacengezamatwara ba Rusesabagina, bashyize ahagaragara inkuru n’inyandiko zamagana icyo bise "ishimutwa" rye ritigeze ribaho, bagera n’aho bahakana ibyo ashinjwa byose, harimo no guhakana bidafite ishingiro umwimerere w’amashusho (video) yashyizwe ku rubuga rwa YouTube rwa radiyo y’umutwe wa MRCD.

Ayo mashusho agaragaza Rusesabagina yemeza ko umutwe ayoboye watangije ibikorwa bya gisirikare bigamije guhirika Guverinoma y’u Rwanda.

Ikinyamakuru The Economist nacyo nticyatanzwe mu kuba umuyoboro w’abashyigikiye Rusesabagina, bagerageza kuyobya uburari no kwivana mu kimwaro; mu nkuru bise "What the arrest of a hero of the genocide says about Paul Kagame’s rule" (Icyo ifatwa ry’intwari ya Jenoside rivuze ku butegetsi bwa Paul Kagame) yo ku wa 3 Nzeri 2020.

Umwanditsi yavuze ibisingizo bya Rusesabagina amwita ”Intwari yo muri Jenoside”, naho ibyaha aregwa arabyoroshya avuga ko guhamagarira abantu gufata intwaro ngo barwanye Leta yabikoreshejwe n’amarangamamutima yamurenze.

Binyuze muri izo nyandiko n’inkuru zigamije kuyobya uburari, icyo abashyigikiye Rusesabagina bifuza ni ukumvisha amahanga ko ari umuturage ufite ubwenegihugu bw’u Bubiligi akaba n’umuturage wa Leta Zunze Ubumwe za Amerika, ko u Rwanda rwamufunze mu buryo butemewe n’amategeko, akaba azira gusa ko atavuga rumwe na Perezida Kagame.

Ni muri urwo rwego, hari ikigo cy’i Washington muri Amerika gikorana na "Rusesabagina Foundation" cyasohoye inyandiko mu kinyamakuru ’The Hill’, isobanura ko ibyaha Rusesabagina aregwa bishingiye mu mugambi wa Leta y’u Rwanda wo "gushakira ibyaha no gucecekesha abatavuga rumwe n’ubutegetsi."

Abiyita ko bashyigikiye Rusesabagina ku mpamvu za politiki n’ubwisanzure nta ko batagize bakoresha itangazamakuru ngo rimugaragaze nk’umugiraneza mu maso y’amahanga; igisigaye ni ukubabona bakora imyigaragambyo mu ntero igira iti "We are all Rusesabagina", (Twese turi Rusesabagina), bamusabira kurekurwa ngo yikomereze ibikorwa yita ko ari "iby’ubugiraneza" ingabo ze zakoze muri Pariki y’Igihugu ya Nyungwe.

Ikibazo kimwe umuntu yakwibaza, ni impamvu ki abiyita ko baharanira ubwisanzure na demokarasi bashyigikiye Rusesabagina n’abaterankunga be batigeze bahagarika kumushyigikira no kumutera inkunga, ahubwo bagakomeza kumwita "umugiraneza", no mu gihe yari amaze gutangaza intambara yo gukuraho guverinoma y’u Rwanda, ndetse akiyemerera ku mugaragaro ku buryo butaziguye ko ari we mugaba w’ikirenga w’umutwe wa FLN; na nyuma y’uko mu Ukuboza 2018 ibihugu by’i Burayi na Amerika bimaze kuvugurura inyandiko iburira abaturage babyo bashaka kuza mu Rwanda, ibamenyesha ko "ibitero bya gisirikare byishe abaturage hafi ya Kitabi, mu nkengero za Pariki y’Igihugu ya Nyungwe", umutwe wa FLN ndetse na Rusesabagina bakaba barigambye ibyo bitero?

Abamushyigikiye ntabwo bamuvanyeho amaboko, ahubwo bakomeje kumutiza umurindi. Umuntu yanakwibaza kandi icyihishe inyuma y’ubukangurambaga mu itangazamakuru mpuzamahanga, aho bashishikariza abantu kunangira bakirengagiza ukuri n’ubutabera, bagahagurukira gusaba ko "intwari" yabo irekurwa; abo bose bari barashyize icyizere muri Rusesabagina, none ntabwo bashaka kwemera ko urugendo rwe rugana mu Rwanda rwabaye iherezo y’imigambi yabo, none barashaka kugerageza kuburizamo ubutabera.

Ni koko rero, ibitangazamakuru byo mu Burayi na Amerika hamwe n’abiyita ko baharanira demokarasi n’ubwisanzure, ntabwo barumva ko ubuzima bw’Abanyafurika bufite agaciro, bakagira n’uburenganzira bwo kubona ubutabera.

Inyandiko zisingiza igihangano kivuga ’ubutwari’ bwa Rusesabagina ndetse n’ibikorwa byo kwamagana ifatwa rye n’urubanza rwe mu Rwanda, bishimangira ako gasuzuguro bafitiye Abanyafurika.

Mu by’ukuri, nta gushidikanya ko ibikorwa byabo bigamije guhishira ipfunwe bafite kubera inkunga bamuteraga. Igihangayikishije abiyita ko baharanira ubwisanzure birirwa bamamaza ko Rusesabagina ari ’intwari’ nka ya hene bita mweru ikirirwa itarishije, ni impungenge ko mu iburanishwa rye ashobora kumena amabanga.

Nk’uko byatangajwe n’Ubushinjacyaha, Rusesabagina yaje mu Rwanda afte telefoni ye, mudasobwa n’inyandiko ze; nta kuntu abamushyigikiye bataterwa ubwoba n’ibiganiro bya WhatsApp biri muri telefoni ye, ibimenyetso bigaragaza inkunga y’amafaranga yagiye ahabwa n’abantu batandukanye, na we akayoherereza abo mu mutwe wa FLN abinyujije ku bo muryango we no kuri "Fondation Rusesabagina"; nta gushidikanya ko abashyigikiye Rusesabagina bakuwe umutima n’uko amakuru ari muri telefoni ye na mudasobwa azajya ahagaragara.

Ngo agapfa kaburiwe ni impongo. Rusesabagina n’abambari be bifuzaga guhungabanya umutekano w’u Rwanda, baraburiwe ko bitazaborohera. Ni mu ijambo rya Perezida Kagame ubwo yavugaga ko Guverinoma y’u Rwanda igiye kurushaho kwereka abanzi ko umutekano w’u Rwanda ufite agaciro cyane.

Yagize ati "Tugiye kuzamura igiciro, kuzamura ikiguzi, kuri buri wese ushaka guhungabanya umutekano wacu. Igiciro kigiye guhenda bihanitse."

Rusesabagina ni igihamya ko Perezida Kagame adakora umuhigo ngo bishirire mu biganiro cyangwa ngo bibe gukanga gusa.

Abiyita ko baharanira ubwisanzure na demokarasi, nyamara bagatera inkunga ibikorwa by’iterabwoba nk’ibya FLN, isomo bakwiye kuvana mu rubanza rwa Rusesabagina ni ukumva ko iterabwoba ridashobora kwitiranwa cyangwa kwihisha inyuma y’ibikorwa bya baringa byo "guteza imbere demokarasi n’ubwisanzure", bagamije gushyira ku butegetsi abo bifuza, binyuze mu kubasingiza mu itangazamakuru mpuzamahanga.

Irindi somo abanyamahanga bashyigikiye Rusesabagina bakwiye kwiga ni uko batarusha ubwenge Abanyafurika; iyo ikipe zihanganye umupira uri mu kibuga, ni ukwibeshya iyo hari umutoza utekereza ko adashobora gutsindwa.

Rusesabagina ni ikimenyetso gifatika ku banyafurika bumva ko bazagezwa ku butegetsi n’abanyamahanga biyita ko baharanira demokarasi n’ubwisanzure, no kubera itangazamakuru mpuzamahanga; barangiza bakijandika mu bikorwa by’iterabwoba.

Bagomba gucunga izamu ryabo cyane, kuko bitabaye ibyo, nk’uko umugani uvuga ngo "inzira ntibwira umugenzi", bazajya bibeshya ko bahagarikiwe n’ingwe bivovote ku maradiyo na za televiziyo, ubundi umunsi umwe bisange mu ndege ibasuzije iwabo.

Ibikubiye muri iyi nyandiko ni ibitekerezo bwite by’umwanditsi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .