Kubohora u Rwanda, igihango FPR Inkotanyi yagiranye n’urubyiruko

Yanditswe na Nshuti Joseph
Kuya 1 Ukwakira 2020 saa 05:23
Yasuwe :
0 0

Nyuma yo kurambirwa ubuzima bw’impunzi ndetse no kubaho nta gihugu, mu mpera za 1990 urubyiruko rw’Abanyarwanda rwabaga mu mahanga rwafashe iya mbere ruza kubohora urwabibarutse. Byari tariki ya 1 Ukwakira 1990 ubwo ingabo za RPA zari ziyobowe na Maj Gen Fred Gisa Rwigema zinjiraga mu Rwanda zinyuze ku mupaka wa Kagitumba uhuza u Rwanda na Uganda.

Gufata umwanzuro wo gukoresha ingufu kugira ngo rubohore igihugu ingoyi y’ubutegetsi bubi bwari bukiboshye, byari uruhurirane rw’ibihe bitandukanye byagiye biba, harimo n’ishyirwaho ry’Umutwe wa Politiki, FPR Inkotanyi, washinzwe mu 1987 ufite intego yo kurwanya ubutegetsi bubi bwabibaga amacakubiri mu Banyarwanda ndetse no gutuma buri Munyarwanda atura atekanye mu gihugu cye.

FPR Inkotanyi yabaye imbundo y’ubumwe hagati y’Abanyarwanda bari barameneshejwe mu rwababyaye, ari nako ishyiraho icyerekezo kimwe gishimangira kudatezuka ku ntego yo kubohora igihugu yari yihaye.

Uyu muryango wakomeje gukura ari nako ugwiza imbaraga, kugeza ubwo ushinze Umutwe w’Ingabo, RPA. Benshi mu bari bagize RPA bari urubyiruko. Urugero ni nka Maj Gen Fred Rwigema wari ufite imyaka 33 ari nawe wari umuyobozi wayo; James Kabarebe wari ufite imyaka 31, ndetse abenshi bari munsi yabo harimo n’abari bafite muri za 20 no munsi yayo.

Urugamba rwo kubohora igihugu ntirwari ya nzira y’amata n’ubuki. Nyuma y’umunsi umwe rutangiye, ku wa 2 Ukwakira 1990, Maj Gen Fred Rwigema yishwe arashwe. Ku wa 23 Ukwakira 1990, abandi bayobozi bakuru, Maj Chris Bunyenyezi na Maj Peter Bayingana baratabarutse nyuma yo kugwa mu mutego w’umwanzi i Ryabega mu Mutara (ubu ni mu Karere ka Nyagatare).

Byari ibihe bikomeye, wafatanyirizaho n’ikibazo cy’amikoro make izi ngabo zari zifite, bigatera kwibaza ku gushoboka kw’intego yo kubohora igihugu zari zihiye.

Zarwanaga n’umwanzi uzirusha amaboko, gusa uru rubyiruko rwari rwambariye ikotaniro ntirwateshutse ku ntego yarwo ahubwo rwakomeje gutwaza gitwari rurangajwe imbere na Maj Gen Paul Kagame.

Ubwo urugamba rwari rurimbanyije ndetse igicu cy’uko ubutegetsi bushobora gusaranganywa binyuze mu nzira y’amahoro cyari gitangiye gukendera ubwo Leta ya Habyarimana yashyiraga umukono ku masezerano y’amahoro yasinyiwe i Arusha muri Tanzania, ibintu byahinduye isura mu ijoro ryo ku wa 6 Mata 1994 ubwo indege ya Habyarimana yaraswaga, biba imbarutso y’ishyirwa mu bikorwa ry’umugambi wo kurimbura Abatutsi Leta ya Habyarimana yari imaze imyaka itegura.

Mu gitondo cyo ku wa 7 Mata 1994, icuraburindi ryagwiririye u Rwanda, Abatutsi hirya no hino mu gihugu batangira guhigishwa uruhindu, ababonywe bakicwa urwagashinyaguro.

Byari ibihe bigoye ku ngabo za RPA, zahise ziha inshingano zo guhagarika Jenoside mu maguru mashya ndetse no kurokora Abatutsi bicwaga bahorwa uko bavutse.

Ni urugamba zarwanye zonyine nyuma y’uko ingabo za Loni zari zoherejwe kubungabunga amahoro mu Rwanda zatereranye ibihumbi by’Abatutsi bari bazihungiyeho kuri Eto Kicukiro maze zisubirira mu bihugu zaturutsemo.

Bato batari gito ntibakomwe mu nkokora n’uwo mwanzuro wa LONI wo kugabanya ingabo zayo mu Rwanda, ahubwo bakomeje kurwanira igihugu maze mu gitondo cyo ku wa 4 Nyakanga 1994 intsinzi yongera kuririmbwa i Rwanda nyuma y’uko RPA ifashe Kigali maze leta yakoraga Jenoside igakwira imishwaro.

Urugamba rukomeye rwo guhagarika Jenoside rwari rurangiye gusa urundi rukomeye ndetse cyane rwo kubaka igihugu no kongera kugisubiza ijabo cyahoranye rwari rutangiye.

Mu ijambo yavuze ku wa 19 Nyakanga 1994 ubwo yarahiriraga kuba Visi Perezida ndetse na Minisitiri w’Ingabo muri guverinoma ya mbere ya nyuma ya Jenoside, Maj Gen Paul Kagame yagize ati “Turebye aho tuva n’aho tugana, ndabona ko nta n’umwe wari ukwiye kuvuga ko twasoje inshingano zacu, ngo ajyeho yicare hasi atekereze ko ibibazo byose byarangiye.”

“Ni igihe cyo guhaguruka tugakorera hamwe, nkuko twabikoze mu bihe byashize bigatuma tugera aho tugeze uyu munsi, tugashyiraho guverinoma dufitiye icyizere ko izayobora igihugu ikakigeza mu nzira y’iterambere.”

Jenoside yakorewe Abatutsi mu 1994 yashegeshe u Rwanda mu buryo bukomeye, ndetse n’ubukungu bwarwo burahatsikirira cyane ku buryo ntawe waruciraga akari urutega.

Ingengo y’imari mu mwaka wakurikiyeho, 1995, yari miliyari 56 Frw aho hejuru ya 70% byayo yari inkunga y’amahanga naho 29% akaba ariyo aturuka imbere mu gihugu.

Perezida wa Sena, Dr Augustin Iyamuremye, wari Minisitiri w’Ubuhinzi, Ubworozi n’Amashyamba muri Guverinoma ya mbere nyuma ya Jenoside, aherutse gutangariza kuri Televiziyo y’Igihugu, ko ingengo y’imari ya mbere nyuma ya Jenoside yari yanditse ku rupapuro rwa paji imwe gusa bitewe n’ubuke bwayo. Mu 1994 kandi, Umutungo Mbumbe w’Igihugu (GDP) wabarirwaga muri miliyoni 753.6 z’amadolari.

Imyaka 26 irashize u Rwanda ruvuye mu icuraburindi rya Jenoside. Muri iyi myaka hakozwe amavugurura atandukanye mu nguni zose z’igihugu yatumye ubu u Rwanda ruba igihugu kimaze kugwiza ibigwi mu ruhando rw’amahanga, igihugu benecyo biratana n’ugisuye ntiyifuze gutaha.

Ubuyobozi bwiza bushyira inyungu z’umuturage imbere, bukimakaza ubumwe n’amahoro ndetse no gutekereza kure, nibyo byabaye imbarutso y’iri terambere amahanga adasiba gutangarira.

Ubukungu bw’u Rwanda bumaze gutumbagira. Kuri ubu ingengo y’imari y’umwaka wa 2020/2021 ni miliyari 3245.7 Frw aho 60.5% byayo ari amafaranga yaturutse imbere mu gihugu, naho 15.2% byayo ni inkunga y’amahanga mu gihe 24.1% ari inguzanyo z’amahanga.

Mu mwaka ushize kandi umutungo mbumbe w’igihugu wari umaze kugera kuri miliyari 9.8 z’amadolari ndetse n’umusaruro ku muturuge ugera ku madolari 825 uvuye ku madolari 146 wariho mu myaka 26 ishize.

Kuba rero urubyiruko rw’icyo gihe rwabashishije gushikama rugahangara umwanzi rukabohora u Rwanda ndetse rugafata iya mbere mu kurusana, biha umukoro ukomeye cyane urubyiruko rwa none wo gusigasira ibyagezweho ndetse no kusa ikivi cyo kubaka u Rwanda rutekanye kandi rukungahaye abarubanjirije batatuye.

Urubyiruko rwa RPA ni urugero rwiza rw’ibyo abantu bashobora kugeraho bishyize hamwe bagasenyera umugozi umwe. Ibi kandi ni ikindi kimenyetso cy’uko icyiza cyose umuntu yatekereza ashobora kukigeraho, gusa bisaba ubushake, kwihangana no kudacika intege.

Kuba RPF Inkotanyi yarabohoye igihugu, ni igihango gikomeye yagiranye n’urubyiruko rwa none n’ahazaza, cyo gukunda igihugu, kugikorera no kurinda ubusugire bwacyo. Gutatira iki gihango, ni ubugwari n’ubuhemu bushobora gusubiza igihugu mu mateka mabi cyanyuzemo.

Ubwanditsi: Nshuti Joseph ni umwanditsi w’Umunyarwanda akaba n’Impuguke mu bya Politiki n’Amateka y’u Rwanda. Afite Impamyabumenyi y’Icyiciro cya Mbere cya Kaminuza mu bijyanye n’Ubucuruzi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .