Abasenateri basabye leta guhagurukira iby’inzu ndangamurage zidakoreshwa ibyo zagenewe

Yanditswe na Kanamugire Emmanuel
Kuya 20 Nyakanga 2016 saa 08:13
Yasuwe :
0 0

Nyuma yo gusanga inyinshi mu nzu ndangamurage z’u Rwanda zikorerwamo ibinyuranye n’ibyo zagenewe, Abasenateri basabye guverinoma guhagurukira iki kibazo hakanozwa imikorere yazo.

Inzu ndangamurage mu Rwanda zigenwa ahanini hashingiwe ku mpamvu nyamukuru y’ibyahabaye, cyane mu mateka yaranze igihugu cyangwa ibindi bishobora gutuma abaturarwanda n’abanyamahanga bashishikarira kuhasura.

Ni mu rugendo abagize komisiyo y’ubukungu n’iterambere ry’imari muri sena basanze hari inzu ndangamurage zikora imirimo idafite aho ihuriye na gato n’ibyo zashyiriweho, ibituma rimwe na rimwe bishobora guca intege abaza gusura izo nzu ntibabone ibyo baje gushaka.

Iyi komisiyo igaragaza inzu yo kwa Kandt, washinze umujyi wa Kigali, igaragaramo ubwoko butandukanye bw’inzoka nyamara yagakwiriye kuba igaragaramo amateka ye n’amavu n’amavuko y’uyu mujyi wanagizwe umurwa mukuru w’igihugu.

Ni ikibazo ihuriyeho n’ingoro y’amateka y’ahahoze urugo rwa Perezida Habyarimana na yo isa n’igaragaza itegurwa n’ishyirwa mu bikorwa rya Jenoside yakorewe Abatutsi mu 1994, ndetse umwe mu bahasuye yasabye ko hashyirwamo ibintu bijyanye na yo kuko nta mateka arambuye y’abaperezida agaragaramo.

Perezida w’iyi Komisiyo, Muhongayire Jacqueline yagize ati" Ikibazo ntikiri kuri izo gusa kuko gisangiwe n’ingoro z’amateka zose. Izo zigengwa n’itegeko ryo mu mwaka wa 2013 ndetse ikigo gishinzwe inzu ndangamurage cyateganyaga ko hazashyirwaho amateka agena ibizakorerwamo ariko ntarajyaho, ari na yo mpamvu batubwiye ko ibikorerwamo kugeza ubu ari iby’agateganyo."

Senateri Bizimana Evariste wari mu basuye izo nzu ndangamurage avuga ko bagiye basanga n’abashinzwe gusobanura amateka yo muri izo nzu batayasobanukiwe, ibituma batanahuriza ku mateka amwe ahagaragarizwa.

Ati"Mu nzu ndangamurage yo kwa Kandt uhageze usanga handitse ngo inzu y’amateka ya Kandt ariko wageramo ugasangamo inzoka. Gusa abahakorera bavuga ko mu Budage aho uyu mugabo akomoka hariyo indi nzu nk’iyi binatuma n’iya hano ari byo bijyamo kuko ari bo bayitera inkunga."

Yakomeje asobanura ko ku nzu ndangamurage y’abaperezida"n’abahari ubwabo ntibasobanukiwe neza ibihari. Hari igiti cy’umurinzi ariko ubaza umuntu ngo kivuze iki akakubwira ngo ni icyo Habyarimana yateye wakireba ukabona kimaze nk’imyaka 200. Wababaza piscine ihari umwe akakubwira ko habagamo uruziramire undi akakubwira ibindi."

Ikindi Senateri Bizimana agarukaho ni uko iyo nzu y’abaperezida igaragaramo Perezida Habyarimana Juvenal, Sindikubwabo Theodore , na Kayibanda Gregoire gusa, bityo ngo n’abandi bakwiriye kongerwamo.

Itegeko rigenga ibigo bya Leta ryasabaga ko mu gihe cy’imyaka ibiri ibigo byose bizaba byamaze guhuza ibyo bikora n’ibiteganywa n’amategeko.

Gusa kuri izo nzu ndangamurage bishobora kutagerwaho kuko itegeko riyagenga bishobora kuba riri kuvugururwa, ibyo abasenateri basanga binashobora kudindiza amateka agomba gushyiraho ibizaba bigaragazwa mu nzu ndangamurage cyane iz’amateka ziri hirya no hino mu gihugu.

Izivugwa ko ibikorerwamo ari iby’agatekanyo kuri ubu zirimo inzu yo kwa Richard Kandt iherereye ku Muhima mu Mujyi wa Kigali, iy’Ibidukikije y’i Karongi iya Huye n’iya Nyanza, n’inzu ndangamateka y’abaperezida iri i Kanombe.

Mu myanzuro itandatu Abasenateri bafashe harimo uvuga ko "Guverinoma igomba kunoza imikorere y’ingoro ndangamurage,ibihakorerwa bigahuzwa n’icyo zagenewe."

Umujyi wa Kigali uherutse gutangaza ko na gereza ya Nyarugenge isigaje igihe gito ngo abayifungiyemo bimurirwe mu nshya ya Mageragere, ikazahindurwa inzu ndangamurage y’amateka yiyongera ku zisanzwe umunani ariko na yo ntiharamenyekana ibizakorerwayo.

Kugeza ubu hakozwe byinshi birimo no kugabanya ibiciro byo gusura inzu ndangamurage ariko ubwitabire bw’abayisura buracyari hasi, ndetse kugeza ubu zisurwa cyane n’abanyamahanga ugereranyije n’abanyarwanda.

Abasenateri bagize komisiyo y’ubukungu n’iterambere ry’imari mu biganiro
Muhongayire Jacqueline, Perezida wa Komisiyo y’ubukungu n’iterambere ry’imari muri Sena

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .