Zimwe mu Ngoro z’Umurage zikwiye gusanwa mu kurinda isibangana ry’ibimenyetso by’amateka

Yanditswe na

Florence Kankwanzi

Kuya 20 Nzeri 2014 saa 05:03
Yasuwe :
0 0

Ubuyobozi bw’Ingoro z’Umurage z’u Rwanda burasaba inzego bireba kubafasha kubona uburyo bwo gusana izo nzu kuko zimwe muri zo zimaze gusaza kandi zibitse ibimenyetso by’amateka kamere n’umuco by’igihugu bikwiye kubungabungwa.
Ibi ni bimwe mu byagaragarijwe Abagize komisiyo y’umuco mu muryango FPR Inkotanyi ubwo basuraga ku mugoroba wo ku wa Gatanu Inzu y’Amateka Kamere ya Kigali izwi nko kwa Kandt, Ingoro y’Abaperezida y’i Kanombe bita kwa Habyarimana hamwe n’Isomero ry’igihugu riri ku Kacyiru.
Aba (...)

Ubuyobozi bw’Ingoro z’Umurage z’u Rwanda burasaba inzego bireba kubafasha kubona uburyo bwo gusana izo nzu kuko zimwe muri zo zimaze gusaza kandi zibitse ibimenyetso by’amateka kamere n’umuco by’igihugu bikwiye kubungabungwa.

Ibi ni bimwe mu byagaragarijwe Abagize komisiyo y’umuco mu muryango FPR Inkotanyi ubwo basuraga ku mugoroba wo ku wa Gatanu Inzu y’Amateka Kamere ya Kigali izwi nko kwa Kandt, Ingoro y’Abaperezida y’i Kanombe bita kwa Habyarimana hamwe n’Isomero ry’igihugu riri ku Kacyiru.

Aba bakomiseri bakaba baragaragarijwe ibyiza usanga muri izo Ngoro z’umurage aho wasangaga bamwe batari bazi n’amateka yabyo.

Usibye gusura ibyiza usanga muri izi Ngoro ndangamurage Umuyobozi w’Ingoro z’Umurage z’u Rwanda Alphonse Umuliisa yabwiye aba bakomiseri ko izo Nzu zifite ibibazo byo gusaza ku buryo zikenewe gusanwa kuko zitagiye zitabwaho uko bikwiye mu myaka yashize.

Agira ati “Ingoro zose zirashaje iya Huye yubatswe muri 1987 itahwa muri 1989, iyo kwa Kandt yubatswe mu 1907, iyo mu Rukari i Nyanza yubatswe muri 1931 naho iyo ku Rwesero yubatswe mu 1959 murumva ko zose ari iza kera”.

By’umwihariko nk’uko bivugwa na Umuliisa ngo Ingoro y’Abaperezida iri I Kanombe ifite ikibazo cyo kuva n’amashanyarazi atensitaye neza ku buryo bayitangaho amafaranga ari hagati y’ibihumbi 200 na 400 kugirango igaragarire neza abayisura.

Umuliisa asanga amafaranga batanga mu gihe cy’umwaka ari menshi ku buryo bayaherewe rimwe byatuma isanwa ntiyongere kuva.

Uyu muyobozi agaragaza ko igihe cyo gusanwa ngo zibe nziza cyari kigeze kugirango mu gihe kiri imbere zizabe ziri ku rwego rwo kwibeshaho dore ko kuri ubu zinjiza hagati ya miliyoni 27 na 30 ku kwezi.

Abisobanura agira ati “Ingoro Ndangamurage n’ahantu Ndangamurage ni igishoro ubwacyo kuko tubona ko mu myaka mike iri imbere zakwibeshaho/zakwihaza mu mafaranga ahava ntizongere gusaba amafaranga Leta ariko ubu ziracyakeneye igishoro kinini mbese ni nk’ubucuruzi bwose”.

Umuyobozi w’ishami ry’ubushakashatsi mu Ngoro z’Umurage z’u Rwanda Jerome Karangwa asanga gusana inzu nk’izi ari ibintu bitapfa gukorwa n’ubonetse wese ngo bisaba abahanga bize kubungabunga ibimenyetso by’umurage bikaba bizima kandi ntibitakaze ishusho yabyo kamere.

Cheik Abdul Karim Harelimana uhagaraiye Komisiyo y’Umuco mu muryango FPR avuga nk’abakurikirana gahunda za Leta mu rwego rw’umuryango FPR inkotanyi basura ibikorwa nk’ibi kugirango barebe uko gahunda za Leta zijyenda zishyirwa mu bikorwa.

Ku bijyanye n’ibibazo bagejejweho Cheik Harelimana yavuze ko bagiye kubigeza ku babishinzwe ariko by’umwihariko asaba ko hakorwa inyandiko igaragaza uko amafaranga binjiza bajya bayakoresha ubwabo maze bigashyikirizwa Minisitiri w’Imari n’Igenamigambi kugirango harebwe niba bakwegurirwa gukoresha umutungo binjiza.

Aba bakomiseri kandi bakangurira Abanyarwanda kumenya ibintu biri mu gihugu cyabo nk’Ingoro z’umurage mu Rwanda bakabishyigikira baza kubisura mbere y’uko bisurwa n’abanyamahanga.

Mu Rwanda hari Ingoro z’umurage 6 arizo Ingoro y’imibereho y’Abanyarwanda iri i Huye, Ingoro y’Ubugeni n’Ubuhanzi iri i Nyanza ku Rwesero, Ingoro y’Umwami iri i Nyanza-Rukari, Ingoro y’Abaperezida iri i Kigali-Kanombe, Ingoro y’Amateka Kamere (inzu ya Kandt ) iri i Kigali-Nyarugenge n’Ingoro y’Ibidukikije iri i Karongi

Kuva muri Nyakanga 2013 kugeza Kamena 2014 izi nzu zimaze gusurwa n’abantu ibihumbi 185 muri bo 70% akaba ari Abanyarwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .