IMF yorohereje u Rwanda kwishyura inguzanyo y’asaga miliyari 16 Frw

Yanditswe na IGIHE
Kuya 7 Ukwakira 2020 saa 07:46
Yasuwe :
0 0

Ikigega Mpuzamahanga cy’Imari ku Isi (IMF) cyorohereje u Rwanda kwishyura inguzanyo ya miliyoni zirenga $16.9, asaga miliyari 16 Frw, kugira ngo rubashe gukomeza guhangana n’ingaruka za COVID-19.

Icyorezo cya COVID-19 cyahungabanyije ubukungu bw’u Rwanda kuko ibyo igihugu cyinjiza bivuye mu misoro byasubiye hasi ndetse ibyo cyohereza mu mahanga n’amafaranga ava hanze biragabanuka.

Kugira ngo ubukungu bw’igihugu bugaruke ku murongo, bisaba ko gishyira imbaraga muri serivisi za ngombwa zirimo no gufashwa koroherezwa kwishyura imyenda.

IMF yafashe icyemezo cyo korohereza ibihugu 28 biri mu nzira y’amajyambere kwishyura inguzanyo kubera ingaruka byagizweho na COVID-19.

Iki cyemezo gifasha igihugu gukomeza gutanga serivisi z’ubuvuzi, ibikorwa bigamije guteza imbere imibereho y’abatishoboye no gufasha abagizweho ingaruka kurusha abandi.

Muri Mata 2020 nibwo u Rwanda rwahawe inguzanyo ya miliyoni $11, ndetse kuri ubu igihe cyo kuyishyura cyongereweho amezi atandatu.

Miliyoni $16.9 zagombaga kwishyurwa IMF mu gihe cy’amezi atandatu hagati ya tariki ya 4 Ukwakira 2020 kugeza ku wa 13 Mata 2021.

Bitewe n’ibihari, umwenda ushobora kwishyurwa mu gihe cy’imyaka ibiri kugeza ku wa 13 Mata 2022, aho uzaba ungana na miliyoni $959.

IMF yafashe iki cyemezo mu gufasha ibihugu gushyira imbaraga mu gutanga serivisi z’ubuvuzi n’izindi zikenewe muri ibi bihe.

Iki kigega kizeza ko kizakomeza gukusanya inkunga igamije korohereza ibihugu kwishyura nibura mu gihe cy’amezi 24.

Muri Kamena 2020, Ikigega Mpuzamahanga cy’Imari ku Isi (IMF) cyari cyahaye u Rwanda inguzanyo ya miliyoni 111.06 z’amadolari, angana na miliyari 105 Frw azakoreshwa mu rwego rw’ubuzima no guhangana n’ingaruka Coronavirus yagize ku bukungu bw’igihugu.

Yari inguzanyo ya kabiri yiyongereye ku yindi ingana na miliyoni $109.4 [miliyari 104 Frw] rwahawe mu ntangiriro za Mata 2020.

Inguzanyo zimaze gutangwa na IMF ziri mu rwego rw’izihuse (Rapid Credit Facility), zihabwa ibihugu biri mu nzira y’amajyambere igihe bifite impamvu zihutirwa zikeneye gushyirwamo amafaranga, zikishyurwa by’igihe kirekire kandi zihendutse.

U Rwanda rumaze guhabwa miliyoni $ 220.46 azarufasha guhangana n’ingaruka icyorezo cya Coronavirus ku bukungu bwarwo.

Icyorezo cya COVID-19 cyahungabanyije ubukungu bw’u Rwanda kuko ibyo igihugu cyinjiza bivuye mu misoro byasubiye hasi ndetse ibyo cyohereza mu mahanga n’amafaranga ava hanze biragabanuka.

Perezida Paul Kagame aganira na Kristalina Georgieva uyobora Ikigega Mpuzamahanga cy'Imari (IMF)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .