Abantu miliyoni 150 bashobora kujya mu bukene bukabije kubera ingaruka za COVID-19

Yanditswe na Umwali Zhuri
Kuya 8 Ukwakira 2020 saa 08:41
Yasuwe :
0 0

Raporo ya Banki y’Isi yagaragaje ko muri uyu mwaka wa 2020, ubukene buziyongera ku kigero kiri hejuru bwa mbere mu myaka 20, bitewe n’ingaruka icyorezo cya Coronavirus cyagize ku bukungu bw’Isi muri rusange.

Iyi raporo yashyizwe hanze kuri uyu wa Gatatu igaragaza ko iki cyorezo kizatuma icyiciro cy’abari mu bukene bukabije cyiyongeraho abantu bari hagati ya miliyoni 88 na 115, ndetse ko uyu mubare ushobora kwiyongera cyane mu mwaka utaha wa 2021 ukagera kuri miliyoni 150 bitewe n’uko ubukungu buzaba bwifashe.

Banki y’Isi isobanura ubukene bukabije nk’igihe umuntu abeshwaho no munsi ya 1,90 $ (hafi 1900 Frw) ku munsi. Byitezwe ko abantu badafite ubushobozi bwo kwinjiza ayo mafaranga muri uyu mwaka bazaba bangana na 9,1% cyangwa 9,4% by’abatuye Isi.

Ikomeza igaragaza ko iyo iki cyorezo kitibasira Isi, ubukene bwari kugabanuka bukagera ku gipimo cya 7,9% mu 2020.

Mu guhangana n’ingaruka z’iki cyorezo, ibihugu byagiriwe inama yo gushaka uburyo bworohereza abantu kubona igishoro, guhanga imirimo mishya ndetse no kwimakaza guhanga ibikorwa bishobora gutanga akazi.

Raporo igaragaza ko ibihugu bizibasirwa cyane n’ubukene bukabije n’ubundi ari ibisanzwe bifite abakene benshi.

Imibare iherutse gutangazwa n’Ikigo cy’Igihugu gishinzwe Ibarurishamibare mu Rwanda, NISR, igaragaza ko icyorezo cya Coronavirus cyagize ingaruka nyinshi ku bukungu by’umwihariko ku murimo, kuko cyatumye amasezerano y’abakozi benshi ahinduka, bamwe arahagarikwa, hagira abashyirwa mu kiruhuko, abandi bagabanyirizwa imishahara.

Ubushakashatsi ku gipimo cy’umurimo n’ubushomeri bwakozwe muri Gicurasi 2020 na NISR, bwagaragaje ko habayeho ukwiyongera kw’abantu badafite akazi ndetse n’igabanuka ry’abari bagafite.

Muri Gicurasi 2020, umubare w’abantu bafite imbaraga zo gukora bari hejuru y’imyaka 16 bafite akazi bari 4.104.303 bingana na 55.2 ku ijana by’abantu bose bari ku isoko ry’umurimo. Abashomeri biyongereyeho abantu 368.484 bingana n’inyongera ya 68.6 ku ijana.

NISR yagaragaje ko igipimo cy’ubushomeri cyiyongereye cyane mu gihe igipimo cy’abantu batari ku isoko ry’umurimo kitahindutse ugereranyije Gicurasi 2020 na Gashyantare 2020.

Raporo ya NISR yagize iti “Muri Gicurasi 2020, igipimo cy’ubushomeri cyari 22,1% bitewe n’ubwiyongere bw’abashomeri, aho bageze ku 905.198 bavuye ku 536.714 bariho muri Gashyantare 2020, ubwo bari 13,1%”.

“Ubwiyongere bw’ubushomeri ndetse n’ukudahinduka kw’imibare y’abantu batari ku isoko ry’umurimo, birerekana ko nyuma ya guma mu rugo yo muri Mata, abantu batakoraga bari cyane ku isoko ry’umurimo, bakora cyangwa bashaka imirimo”.

Muri Gicurasi 2020, igipimo kinini cy’ubushomeri cyari hejuru mu bagore, aho banganaga na 25 ku ijana ugereranyije no mu bagabo kiri kuri 19,6 ku ijana. Mu rubyiruko ruri hagati y’imyaka 16-30, igipimo cy’ubushomeri kiri kuri 27,2 ku ijana, mu bafite imyaka 31 kuzamura ni 17,7 ku ijana.

Ubukene bukabije byitezwe ko bugiye kwiyongera ku Isi kubera ingaruka icyorezo cya COVID-19 cyateye ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .