00:00:00 IGIHE NETWORK KN KINYARWANDA EN ENGLISH FR FRANCAIS

Amakusanyirizo y’amata 30 agiye guhindurwamo inganda za yaourt na frommage

Yanditswe na Ntabareshya Jean de Dieu
Kuya 13 May 2022 saa 05:23
Yasuwe :

Minisiteri y’Ubuhinzi n’Ubworozi mu Rwanda yatangaje ko igiye kongerera ubushobozi amakusanyirizo y’amata yubatswe muri gahunda yo guteza imbere ibikomoka ku bworozi, akagera ku rwego rwo gutunganya Yaourt na Frommage mu kongerera agaciro ibikomoka ku bworozi.

Ubusanzwe amakusanyirizo y’amata (Milk Collection Centre, MCC) yashyizweho muri gahunda yo gufasha abaturage gutunganya umusaruro w’amata.

Ni umushinga washyizwe mu turere 12 aho muri buri Karere hashyizwe nibura amakusanyirizo manini y’amata ariko hakaba n’andi mato agemura kuri ayo kusanyirizo ayahuza yose.

Muri iyo gahunda hasanwe amakusanyirizo y’amata agera kuri 58, ahabwa ubushobozi n’ibikoresho mu gihe hanubatswe andi mato azwi nka Milk Collection Point agera kuri 50.

Kugeza ubu, uyu mushinga ukorera mu turere 14, mu Ntara y’Iburasirazuba ni Nyagatare, Rwamagana, Kayonza na Gatsibo. Mu Majyaruguru ni Gicumbi, Burera na Musanze, mu Burengerazuba ni Nyabihu, Rubavu, Rutsiro na Ngororero mu gihe mu Ntara y’Amajyepfo ukorera i Nyanza, Huye na Ruhango.

Ni umushinga watangiye mu 2016 biteganyijwe ko uzarangirana na 2022 ukaba warashowemo asaga miliyari 65 Frw kuko Ikigega Mpuzamahanga cy’Iterambere ry’Ubuhinzi, IFAD, cyatanzemo miliyoni 44,71 $, Umuryango Mpuzamahanga wita ku iterambere Heifer ugatanga miliyoni 4 $, abaturage bishakamo miliyoni 5,93 $, ibigo bindi by’imbere mu gihugu bitanga miliyoni 6,57 $ mu gihe guverinoma yatanze miliyoni 3,86 $.

Ayo makusanyirizo ari hirya no hino mu gihugu afitiye abaturage akamaro kuko batagikora urugendo rurerure bashaka aho bagurisha bakanatunganyiriza umukamo wabo.

Ibi byahinduye isura y’ubworozi kuko bisigaye bifasha abaturage bahuraga n’imbogamizi zo kubura aho bagurishiriza amata bityo bagahendwa n’abamamyi.

Mu rugendo rwo kuri uyu wa Gatatu tariki ya 11 Gicurasi 2022 rwakorewe mu Ntara y’Amajyepfo mu Karere ka Ruhango, rukorwa na Visi Perezida w’Ikigo Mpuzamahanga gishinzwe iterambere ry’Ubuhinzi IFAD, Dominik Ziller uri mu Rwanda, yagaragarijwe ko abaturage bifuza kugira amakusanyirizo y’amata ariko afite ubushobozi bwisumbuyeho.

Umuyobozi wa Koperative ifite ikusanyirizo ry’amata mu Karere ka Ruhango mu Murenge wa Byimana, yagaragaje ko bafite intego yo kugira ikusanyirizo rikomeye ryisumbuyeho kuko bifuza gutunganya umusaruro ukomoka ku mukamo w’abaturage kugira ngo wongererwe agaciro.

Yagize ati “Turifuza ko twagira ikusanyirizo rifite ubushobozi bwo guteza imbere ubworozi bwacu, dukeneye ko twagira n’ahantu abantu bashobora kugurira imiti y’amatungo, ibiryo byayo ndetse twifuza gutunganya Yaourt na Frommage tukongerera agaciro y’amata.”

Umunyamabanga Uhoraho muri Minisiteri y’Ubuhinzi n’Ubworozi, Jean Claude Musabyimana, yavuze ko hari gahunda ihari yo guteza imbere amakusanyirizo y’amata ku buryo ahabwa imbaraga akaba igicumbi cyo guteza imbere ubworozi mu gace aherereyemo.

Ati “Ubundi MCC zishyirwaho, igitekerezo Leta yari izifiteho ntabwo ari ukuba ahantu ho gucururiza amata gusa, ahubwo ni ukuba igicumbi cy’iterambere ry’ubworozi mu karere zirimo. Uretse kuba bashobora gufasha abantu kubona isoko ry’amata, bagomba no kubafasha kubona ibikenewe kugira ngo ayo mata aboneke.”

Musabyimana yakomeje agaragaza ko mu byo ayo makusanyirizo manini yakagombye kuba akora harimo kubona iby’ibanze umworozi akenera nk’imbuto nziza y’ubwatsi n’ibindi bigamije kongera umukamo.

Ati “Harimo kubona imbuto nziza ibiryo by’amatungo ndetse no kongera ubushobozi zifite bwo gufata amata zikayakonjesha zikayagurisha ahubwo akaba yabyazwa n’undi musaruro ukenewe.”

Yagaragaje ko Minisiteri y’Ubuhinzi n’Ubworozi yifuza gukomeza gukorana n’amakoperative yubakiwe ayo makusanyirizo y’amata muri buri Karere kugira ngo bahuze imbaraga ibyo bikenewe byose harebwe ko byagerwaho.

Musabyimana yasobanuye kandi ko kuba barafatanyije n’aborozi hakubakwa ayo makusanyirizo, bisobanuye ko bafite ubushobozi bwo kuyateza imbere.

Yahishuye ko hazakuzanywa ubushobozi aborozi bafite hanyuma ku bufatanye n’inzego zitandukanye bashyigikirwe mu kwagura inshingano za MCC, hagamijwe iterambere ry’ubworozi muri buri Karere ziherereyemo.

Nubwo bimeze bityo ariko mu gihe ayo makusanyirizo yahindurwa inganda nto bishobora kugira ingaruka ku nganda nini zatunganyaga amata nk’Inyange, Nyanza Dairy Industry n’izindi.

Amakuru IGIHE ifitiye ni uko amakusanyirizo azahindurwa inganda nto azaba afite inshingano zo gukorana n’ibigo by’amashuri kugira ngo abana banywe amata atunganyijwe mu kwirinda indwara.

Umuyobozi Mukuru wungirije wa IFAD ku rwego rw’Isi, Dominik Ziller uri mu Rwanda mu ruzinduko rw’iminsi ibiri yashimye cyane umuhate w’aborozi n’abahinzi bo mu Rwanda mu kwishakamo ibisubizo.

Dominik Ziller yatangaje ko hari ibikorwa byinshi iki kigo abereye umuyobozi cyifuza gukorana n’abahinzi bo hasi cyane mu Rwanda kandi ko nibura nyuma y’imyaka mike hari na gahunda yo gutangiza undi mushinga mu Rwanda ushobora kuzashorwamo asaga miliyoni 50$ kandi ngo ushobora kuzafasha aborozi mu kwagura ubushobozi bwa MCC nk’uko babyifuza.

IFAD yatanze miliyoni 44,71 $ muri uyu mushinga yari ihagarariwe
Umujyanama w'Umuyobozi wungirije wa IFAD yari yitabiriye uyu muhango
Umukozi muri IFAD ishami ry'u Rwanda, yahisemo kwitwa Ingabire kubera gukunda u Rwanda
Meya wa Ruhango, Habarurema Valens, yagaragaje ko MCC zagize impinduka ku bworozi bw'aka karere
Aya makusanyirizo yubatswe afite ibikoresho bitunganya amata bigezweho
Aborozi bo muri Ruhango bagaragaje bifuza kwagura ikusanyirirzo ryabo
Usanga abaturage bazanye amata yabo ngo atunganywe
Umuyobozi Mukuru wungirije wa IFAD, Dominik Ziller, yavuze ko iki kigo kizakomeza kuba hafi abahinzi bo mu Rwanda
Umuyobozi wungirije wa IFAD yashimiwe n'aborozi bo mu Ruhango
Umuyobozi Mukuru w'Ikigo cy'Igihugu Gishinzwe Iterambere ry'Ubuhinzi n'Ubworozi mu Rwanda (RAB), Dr Patrick Karangwa nawe ari mu bari bitabiriye
Umunyamabanga uhoraho muri Minisiteri y'Ubuhinzi n'Ubworozi Musabyimana Jean Claude yasobanuye ko Leta ifite gahunda yo guteza imbere MCC

Amafoto: Munyakuri Prince


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .