BNR yagaragaje ko gukoresha ikoranabuhanga mu kwishyurana atari iby’abakire gusa

Yanditswe na Ishimwe Israel
Kuya 25 Gashyantare 2020 saa 09:07
Yasuwe :
0 0

Uko imyaka yicuma ikoranabuhanga ryimakazwa mu ngeri zose z’ubuzima bwa muntu kugeza no mu guhererekanya amafaranga mu ntoki mu kugura ibicuruzwa na serivisi.

Banki Nkuru y’Igihugu (BNR) igaragaza ko kwishyurana hifashishijwe ikoranabuhanga byihutisha ubukungu kandi amafaranga atakara mu bucuruzi akagabanuka cyane.

Imibare yo mu 2017 igaragaza ko nibura buri mwaka BNR itakaza miliyari ebyiri zo gukoresha inoti nshya n’ibiceri bisaza kubera guhererekanywa mu ntoki.

Umuco wo gukoresha ikoranabuhanga mu kwishyurana umaze gutera imbere kuko mu 2011 hahererekanyijwe miliyari 5 Frw mu gihe mu 2017 yageze kuri miliyari 57 Frw.

Abanyarwanda basabwa gukomeza guhererekanya amafaranga bifashishije ikoranabuhanga kuko byihutisha serivisi kandi bigakemura ibibazo by’ubujura.

Umuyobozi w’Ishami rya BNR i Rusizi, Nyirazaninka Patricie, mu butumwa yahaye abitabiriye ibirori byo gusoza Agace ka Gatatu ka Tour du Rwanda 2020, ka Huye-Rusizi kegukanywe n’Umunya-Colombia Restrepo Jhonatan, yababwiye ko iryo koranabuhanga ritareba gusa abifite cyangwa abanyamujyi.

Yagize ati “Ni ngombwa gukoresha ikoranabuhanga mu kwishyura, ni igisubizo ku bijyanye n’amafaranga dutakaza mu ngendo, iyo duhuye n’abatekamutwe, tugiye guhaha n’ahandi tuyitwaje mu ntoki.’’

Yasabye abaturage gushyira imbere ikoranabuhanga mu kwishyurana kuko ari inyungu zihuriweho.

Ati “Tugire umuco wo gukoresha ikoranabuhanga mu kwishyura. Abacuruzi mubibonamo inyungu kuko iyo mwakiriye amafaranga mu ntoki mushaka abakozi bo kuyajyana kuri banki.’’

U Rwanda rufite inyungu mu gukoresha iryo koranabuhanga kuko ikiguzi Leta yatangaga mu gusimbuza inoti n’ibiceri bigabanuka na serivisi zikihuta.

Muri ubu buryo umuntu ashobora kwishyura akoresheje ikarita y’urugendo, Pos, mudasobwa na serivisi za Mobile Money.

U Rwanda rufite intego ko mu mwaka wa 2024, amafaranga abarirwa ku kigero cya 80 % y’umusaruro mbumbe w’igihugu azajya ahererekanywa hifashishijwe ikoranabuhanga, avuye kuri 34.6% mu 2019.

Cogebanque nka Banki Nyarwanda itanga serivisi mpuzamahanga, yashyizeho serivisi zihariye zorohereza abaturarwanda kugera kuri icyo cyerekezo.

Umuyobozi ushinzwe uburyo bwo kubitsa hifashishijwe Ikoranabuhanga muri Cogebanque, Yvon Gilbert Nishimwe, yabwiye IGIHE ko bafatanyije na BNR bari gushishikariza abantu kwishyura bakoresheje ikoranabuhanga.

Yagize ati “I Rusizi tumaze kubaha uburyo bwo kwishyurana bifashishije iryo koranabuhanga kandi barabyitabira. Turifuza ko baba benshi ngo tugere ku cyerekezo cy’igihugu. Tuzakomeza kubegereza serivisi zibafasha.”

Cogebanque ifite serivisi zitandukanye zirimo ikoranabuhanga rya Internet Banking, Mobile Banking [ikoresha telefoni ngendanwa], mobile wallet ikoreshwa muri smartphone ndetse igiye no kongerwamo serivisi yafasha ushaka inguzanyo kuyisaba kuri telefoni, smart cash card n’amakarita ya MasterCard (Debit, Credit na Prepaid) afasha abayakoresha kwishyura no kubikuza ahantu harenga miliyoni 36 ku Isi yose.

Nishimwe yavuze ko mu kugeza serivisi zo guhererekanya amafaranga hifashishijwe ikoranabuhanga mu bice by’icyaro hakoreshwa aba-agents.

Cogebanque Plc ifite amashami 28 mu gihugu hose aho ifite ibyuma bya ATM 34, aba-agents barenga 600 bayifasha gutanga serivisi zo gufunguza konti, kubitsa no kubikuza zirimo n’izifashisha ikoranabuhanga.

Cogebanque Plc itera inkunga Tour du Rwanda yayiherekeje igenda isobanurira abakunzi bawo serivisi z’imari zijyanye no gufunguza konti, kubitsa no kwizigamira.

Indi nkuru wasoma: Restrepo Jhonatan yegukanye Agace ka Gatatu ka Tour du Rwanda 2020, Biniam afata umwambaro w’umuhondo (Amafoto)

Umuyobozi w’Ishami rya BNR i Rusizi, Nyirazaninka Patricie, yashimangiye ko gukoresha serivisi z’ikoranabuhanga mu guhererekanya amafaranga bifite inyungu ku gihugu cyose
Usibye gusobanurirwa imikoreshereze y'ikoranabuhanga mu guhererekanya amafaranga, Cogebanque itanga ibihembo ku banyamahirwe bafunguza konti bakabitsaho amafaranga menshi. Yatashye amwenyura nyuma yo gushyirwa mu cyuma gitanga amafaranga, akayora ayo ashoboye mu gihe cyagenwe
Abahabwa ibihembo banabazwa ibibazo bitandukanye. Aha MC Buryohe yaganiraga n'umwe mu baturage b'i Rusizi
Abaturage bo mu Karere ka Rusizi bibukijwe gukoresha ikoranabuhanga mu kwishyurana, Cogebanque yiyemeza kubegereza serivisi zose zizabibafashamo
Hari abahawe amahirwe yo kuyora amafaranga...
Umuyobozi ushinzwe uburyo bwo kubitsa hifashishijwe Ikoranabuhanga muri Cogebanque, Yvon Gilbert Nishimwe, yavuze ko banki ifite gahunda yo gukomeza gushishikariza Abanyarwanda gukoresha ikoranabuhanga mu kwishyurana no kuborohereza kurigeraho.
Cogebanque ni umuterankunga w'imena wa Tour du Rwanda 2020
Abakobwa beza baherekeje Cogebanque aho isiganwa ry'amagare rinyura hose mu ntara zose z'u Rwanda
Muri Tour du Rwanda 2020, Cogebanque niyo itanga umwenda w’umukinnyi wa mbere mu guterera imisozi. Agace ka Gatatu ka Huye-Rusizi wahawe Yemane Dawit ukomoka muri Érythrée

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .