Ibigo 176 byamaze kwemererwa inguzanyo mu Kigega Nzahurabukungu

Yanditswe na Iradukunda Serge
Kuya 14 Ukwakira 2020 saa 04:02
Yasuwe :
0 0

Minisitiri w’Ubucuruzi n’Inganda, Soraya Hakuziyaremye, yavuze ko ibigo by’ubucuruzi 176 aribyo bimaze kwemererwa inguzanyo mu Kigega Nzahurabukungu kigamije gufasha ibigo byashegeshwe cyane n’icyorezo cya Coronavirus kongera kwiyubaka.

Muri Kamena nyuma yo kubona ingaruka icyorezo cya Covid-19 gikomeje kugira ku bukungu bw’igihugu nibwo Leta y’u Rwanda yafashe icyemezo cyo gutangiza iki kigega Nzahurabukungu yise ‘Economic Recovery Fund –ERF’.

Ku ikubitiro, muri iki kigega Leta yashyizemo akabakaba miliyari 95 Frw (miliyoni 100 z’amadolari). Aya mafaranga azagenda yongerwa agere kuri miliyoni 200 z’amadolari mu gihe cy’imyaka ine.

Mu kiganiro Minisitiri Hakuziyaremye yagiranye n’itangazamakuru kuri uyu wa 14 Ukwakira, yavuze ko ibigo bigera ku 176 birimo amahoteli 149 n’ibindi 27 aribyo bimaze kwemererwa inguzanyo muri iki kigega.

Ati “Mu guhangana n’ingaruka za Covid-19 hashyizweho ikigo cy’ingoboka cyatangiye mu kwezi kwa gatandatu uyu mwaka, aho ubu ibigo bigeze ku 176 harimo hoteli 149 n’ibigo 27 byari byarasabye izo nguzanyo byazemerewe.”

Yakomeje avuga ko ku bufatanye n’inzego bireba, hashyizweho uburyo bwo korohereza byifuza inguzanyo muri iki kigo kuzibona.

Minisitiri Hakuziyaremye yavuze ko ubu umucuruzi ushaka inguzanyo muri iki kigega asaba kwerekana ko ubucurizi bwe bwahungabanyijwe na Covid-19 ku kigero cya 30% bitandukanye na mbere aho basabwaga kuba nibura bwarahungabanyijwe n’iki cyorezo ku kigero cya 50%.

Ati “Hari kandi n’uko twakoze amavugurura na Banki Nkuru y’u Rwanda na Minisiteri y’Imari n’Igenamigambi kugira ngo ibigenderwaho ngo ibigo by’ubucuruzi bibone izo nguzanyo byoroherejwe kurushaho, icya mbere mu byahinduwe ni ukugabanya ijanisha ry’ingaruka za Covid-19 ku bucuruzi aho umuntu asabwa kwerekana ko yagize igihombo kingana na 30% bitewe na Covid-19 aho kugira ngo dusabe 50%.”

Uretse ubu buryo Minisitiri w’Ubucuruzi n’Inganda yavuze ko kandi bemereye ibikorwa by’ubucuruzi bitanditse kuba nabyo byagana iki kigega bigahabwa inguzanyo.

Nubwo Minisitiri Hakuziyaremye atavuze ingano y’amafaranga amaze guhabwa aya mahoteli, muri Kanama, Minisitiri w’Imari n’Igenamigambi, Dr. Uzziel Ndagijimana yari yavuze ko muri miliyari 95 Frw ziri mu iri iki kigegea ko izigera kuri 50 Frw zizahabwa amahoteli kubera ko bari mu bagizweho ingaruka cyane.

Yagize ati: “Amadosiye yihuse cyane ni ay’amahoteli, bijyanye n’uko bababaye kurusha abandi. Amadosiye yamaze gusuzumwa ku mabanki, ararangira, ubu ageze ku rwego rwa BNR, ari narwo rwa nyuma ngo yemezwe”.

Yakomeje agira ati “Ikindi amafaranga yagenwe, za miliyari 50 Frw, hafi ya yose agiye gukoreshwa ukurikije amadosiye yasuzumwe”.

Icyorezo cya Covid-19 cyatumye umuvuduko w’iterambere u Rwanda rwagenderagaho ugabanuka ugera ku kigero kitigeze kibaho mu myaka 15 ishize. Byitezwe ko ubukungu bw’u Rwanda buzazamuka ku kigero cya 2% gusa muri uyu mwaka. Mu gihe Banki y’Isi yavugaga ko bwakagombye kuba bwarazamutse ku kigero cya 8% iyo hatazamo imbogamizi za Coronavirus.

Ibigo 176 bimaze kwemererwa inguzanyo mu Kigega Nzahurabukungu,ibintu byitezweho kuzagabanya ingaruka Covid-19 yari kuzagira ku bukungu bw'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .