00:00:00 IGIHE NETWORK KN KINYARWANDA EN ENGLISH FR FRANCAIS

Inyungu zitezwe ku isoko mpuzamipaka rya Rusumo ryuzuye ritwaye miliyari 4 Frw (Amafoto)

Yanditswe na Hakizimana Jean Paul
Kuya 14 May 2022 saa 07:55
Yasuwe :

Ubuyobozi bw’Akarere ka Kirehe buratangaza ko isoko mpuzamipaka ryubatswe ku mupaka wa Rusumo uhuza u Rwanda na Tanzania, rigiye gutangira gukorerwamo bitarenze mu byumweru bibiri biri imbere, rikaba ryitezweho gufasha abaturage kugurisha bimwe mu bicuruzwa byabo ndetse bakanabona hafi ibyo bajyaga gushaka hirya y’umupaka.

Ni isoko ryuzuye ritwaye miliyari 4 Frw, rifite ibyumba 54 by’ubucuruzi busanzwe hakabamo ububiko bw’ibicuruzwa, amacumbi azafasha abifuza kurara hafi y’umupaka ndetse n’igice cya rusanzwe kizacururizwamo ibiribwa.

Bamwe mu baturage baganiriye na IGIHE baturiye uyu mupaka wa Rusumo bavuga ko baryitezeho kuborohereza kubona bimwe mu bicuruzwa bajyaga gushaka muriTanzania birimo umuceri, amavuta n’ibindi.

Rugema Eric ucuririza ku mupaka wa Rusumo yagize ati “Nkanjye nakoreraga muri kioske nto, yari inzu nto y’icyuma ishyuha cyane ku buryo byatumaga abakiliya banjye batisanzura, ikindi hano hazaba uruhurirane rw’abakiliya benshi bitume natwe tubona inyungu iri hejuru.”

Rugema yakomeje avuga ko ubusanzwe nko kubona ibicuruzwa biturutse Tanzania cyangwa bo kugira ngo bagurishe ababayo byagoranaga cyane kuko ngo bisaba ibyangombwa byinshi ariko ngo kuri ubu byose bazajya babisanga muri iri soko rishya bujurijwe.

Umuyobozi w’Akarere ka Kirehe, Rangira Bruno yabwiye IGIHE ko batangiye kwakira amabahasha y’abifuza kurikoreramo, akaba yavuze ko mu byumweru bibiri biri imbere ari bwo biteze ko aba mbere bazaba batangiye kuricururizamo.

Yagize ati “Ari abacuruzi bato bajyaga gushaka ibintu muri Tanzania, turumva ko ibyo bajyaga gushakayo bashobora kuzajya babibona hano, hari n’ibyo abaturuka muri Tanzania baba bashaka mu Rwanda na bo bazajya babibonera muri ririya soko nk’amata, imbuto n’ibindi.”

Meya Rangira yavuze kandi ko kuri ubu barimo kuvugana n’abashinzwe umupaka ku buryo hakorwa ubukangurambaga abacuruzi ba Tanzania na bo bakaza gukoreramo.

Umupaka wa Rusumo ni umwe mu ikoreshwa mu kwinjiza mu gihugu ibicuruzwa byinshi. Nibura ku munsi unyuraho amakamyo 300 aba apakiye ibicuruzwa birimo ibyinjizwa mu Rwanda n’ibikomeza mu bindi bihugu.

Abacuruzi baryitezeho kuborohereza kubona bimwe mu bicuruzwa bajyaga gushaka muri Tanzania
Iri soko mpuzamipaka ryuzuye ritwaye miliyari enye z'amafaranga y'u Rwanda
Harimo igice kizajya gicururizwamo ibiribwa
Umuyobozi w'Akarere ka Kirehe, Rangira Bruno yavuze ko mu byumweru bibiri biri imbere rizaba ryatangiye gukorerwamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .