Abantu 29 bakize Coronavirus mu Rwanda, abanduye biyongereyeho bane

Yanditswe na Ishimwe Israel
Kuya 30 Nzeri 2020 saa 09:53
Yasuwe :
0 0

Minisiteri y’Ubuzima yatangaje ko abantu 29 bakize Coronavirus mu gihe abagera kuri bane bayisanganywe mu bipimo 2807 byafashwe kuri uyu wa Gatatu.

Itangazo rya Minisante rigaragaza ko abarwayi bashya bakuwe mu duce dutandukanye mu Mujyi wa Kigali no mu Turere twa Gatsibo, Nyamagabe na Rubavu, hose habonetse umwe.

Tariki 14 Werurwe 2020 nibwo Minisiteri y’Ubuzima yemeje ko Umuhinde wageze mu gihugu ku wa 8 Werurwe 2020 avuye i Mumbai, yasanganywe icyorezo cya COVID-19 giterwa n’agakoko gashya ka Coronavirus.

Kuva COVID-19 igaragaye mu Rwanda, hamaze kuboneka abantu 4840 bayanduye mu bipimo 495 793 bimaze gufatwa. Muri bo 3154 barasezerewe nyuma yo gupimwa bagasangwa nta bwandu bwayo bukiri mu maraso yabo mu gihe 1657 bakirwaye. Abantu 29 nibo bamaze guhitanwa n’iki cyorezo.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 34 080 595 bamaze kuyandura ku Isi yose, barimo 1 016 422 yahitanye mu gihe 25 323 835 bamaze kuyikira.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .