Abantu 31 basanzwemo Coronavirus, abandi 49 barayikira

Yanditswe na IGIHE
Kuya 30 Nyakanga 2020 saa 10:29
Yasuwe :
0 0

Kuri uyu wa Kane, abantu 31 basanzwemo Coronavirus mu bipimo 4,066 byafashwe, bituma umubare w’abamaze kwandura uba 1,994 mu gihe 49 ari bo bayikize, abamaze gukira bagasezererwa mu bitaro ni 1,085.

Abarwayi bashya bagaragaye muri Kigali aho habonetse 13 bahuye n’abanduye n’abaturarwanda batashye muri Rusizi ni 11, Nyamasheke habonetse 4 bapimwe mu midugudu iri mu kato, Kirehe ni umwe, Kayonza ni umwe na Rubavu ni umwe.

Minisiteri y’Ubuzima itangaza ko hari ukwiyongera kw’abandura icyorezo cya Coronavirus muri ibi byumweru bibiri bishize, isesengura rikaba ryaragaragaje ko abenshi ari abari hagati y’imyaka 20 na 49, kuko batari kubahiriza amabwiriza yo kwirinda nk’uko yatangajwe.

Minisitiri w’Ubuzima, Dr Ngamije Daniel, yavuze ko abari hagati y’imyaka 20 na 49, usanga abenshi batambara udupfukamunwa kandi bari mu bantu benshi, bakajya mu mahuriro amwe n’amwe atemewe nko kujya mu minsi mikuru mu ngo mu buryo bihishe.

Abari muri iki cyiciro kandi usanga bamwe bagiye mu mihango ya Kinyarwanda yo gusezera ku bantu bapfuye cyangwa se no ku kiriyo, ukahabasanga ari benshi cyane bamwe batambaye udupfukamunwa kandi bacucitse nta ntera bahanye.

Aba kandi ni bo usanga mu mirimo itandukanye cyane cyane nko mu masoko, aho usanga abakoresha baradohotse mu gukurikirana uko abakozi babo birinda icyorezo.

Minisiteri y’Ubuzima ntihwema gusaba abanyarwanda kwambara agapfukamunwa, gukaraba intoki n’amazi meza n’isabune cyangwa umuti wabugenewe no guhana intera.

Kuva umurwayi wa mbere wa Coronavirus yagaragaye mu Rwanda ku wa 14 Werurwe 2020, hamaze kuboneka 1994 bayanduye mu bipimo 260 025 bimaze gufatwa, 1085 barayikize mu gihe 904 bakirwaye naho batanu bitabye Imana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .