Abantu 34 barimo 21 b’i Kigali banduye Coronavirus, 19 bayikize

Yanditswe na Ishimwe Israel
Kuya 22 Nyakanga 2020 saa 09:56
Yasuwe :
0 0

Minisiteri y’Ubuzima yatangaje ko abantu 34 basanganywe Coronavirus mu bipimo 4613 byafashwe mu masaha 24 yashize mu gihe 19 bakize basezererwa mu bitaro.

Mu barwayi bashya basanzwemo ubwandu bwa COVID-19 iterwa n’agakoko gashya ka Coronavirus kuri uyu wa Gatatu, tariki ya 22 Nyakanga 2020, harimo 21 basanzwe mu Mujyi wa Kigali barimo abahuye n’abanduye n’abapimiwe mu midugudu iri mu kato, i Rusizi hakuwe batandatu, i Nyamasheke hava bane, Kirehe habonetse babiri mu gihe Ngoma hagaragaye umwe.

Umubare w’abamaze kwandura Coronavirus kuva umurwayi wa mbere agaragaye mu Rwanda ku wa 14 Werurwe 2020 bamaze kuba 1689 mu bipimo 225 652 barimo 867 bakize mu gihe 817 bakirwariye kwa muganga. Abantu batanu nibo bahitanywe na Coronavirus.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .