Abantu babiri b’i Rwamagana bishwe na Coronavirus

Yanditswe na Ishimwe Israel
Kuya 9 Ugushyingo 2020 saa 10:19
Yasuwe :
0 0

Minisiteri y’Ubuzima yatangaje ko abaturage babiri bo mu Karere ka Rwamagana bishwe na COVID-19 mu Rwanda, bituma umubare w’abamaze guhitanwa n’iki cyorezo ugera kuri 38.

Itangazo rya Minisante ryo kuri uyu wa Mbere rivuga ko abitabye Imana bahitanywe na COVID-19 iterwa na Coronavirus ari abagabo babiri b’imyaka 45.

Rikomeza riti “Twihanganishije imiryango y’abagabo babiri b’imyaka 45 bitabye Imana i Rwamagana.’’

Ni ku nshuro ya kane mu Rwanda hapfuye abantu babiri bazize COVID-19 mu munsi umwe; imibare nk’iyi yanabonetse ku wa 24 Kanama, ku wa 18 Nzeri 2020 no ku wa 25 Nzeri 2020.

Kuri uyu wa 9 Ugushyingo 2020, abantu 20 basanzwemo ubwandu bwa COVID-19 mu bipimo 1293 byafashwe, mu gihe barindwi barimo abavurirwaga mu bitaro no mu ngo zabo bakize.

Abarwayi bashya bagaragaye muri Kigali:1, Huye:3, Kayonza:1, Kirehe:1 na Rwamagana ahasanzwe 14.

Kuva ku wa 14 Werurwe 2020 ubwo umurwayi wa mbere yabonekaga mu Rwanda hamaze gufatwa ibipimo bya Coronavirus 571 902, byasanzwemo 5242 banduye. Muri bo 4967 barasezerewe nyuma yo gupimwa bagasangwa nta bwandu bagifite mu mibiri yabo mu gihe 237 aribo bakiri kwitabwaho.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .