Babiri bishwe na Coronavirus mu Rwanda, 224 barayikira

Yanditswe na Akayezu Jean de Dieu
Kuya 19 Gashyantare 2021 saa 09:52
Yasuwe :
0 0

Imibare ya Minisiteri y’Ubuzima yo kuri uyu wa Gatanu igaragaza ko mu masaha 24 ashize abantu babiri bishwe na Coronavirus mu gihe abakize iki cyorezo biyongereyeho 224.

Abantu bishwe na Coronavirus ni abagore babiri barimo umwe w’imyaka 77 wo mu Karere ka Kamonyi n’undi w’imyaka 42 wo mu Mujyi wa Kigali.

Itangazo rya Minisiteri y’Ubuzima rigaragaza ko mu bipimo 4862 byafashwe kuri uyu wa 19 Gashyantare 2021, abantu 94 aribo basanganywe ubwandu bwa Coronavirus.

Mu banduye bashya harimo abo mu Mujyi wa Kigali 23, abandi 12 basanzwe mu Karere ka Ruhango naho muri Nyaruguru na Ngororero hose habonetse 8 muri buri Karere mu gihe hari utundi turere twa Rutsiro, Bugesera na Huye dukomeje kutagaragaramo abarwayi bashya ba Coronavirus.

Ni mu gihe kuri uyu wa Gatanu, Umukuru w’Igihugu yayoboye Inama y’Abaminisitiri yagarutse ku ngingo zirimo ingamba ziherutse gushyirwaho zo kwirinda ikwirakwira ry’icyorezo cya COVID-19.

Umubare w’ubwandu bushya bwa Coronavirus ukomeje kugenda ugabanuka muri iyi minsi, ibintu byitezweho kuza koroshya ingamba ziheruka gushyirwaho ku wa 8 Gashyantare 2021 ubwo Umujyi wa Kigali wakurwaga muri gahunda ya Guma mu rugo.

Kugeza uyu munsi, Minisiteri y’Ubuzima igaragaza ko kuva icyorezo cya COVID-19, cyagera mu Rwanda abantu 17 929 ni bo bamaze kucyandura mu bipimo 969 254 bimaze gufatwa.

Muri rusange abantu 16 387 ni bo bamaze gukira iki cyorezo mu gihe abo kimaze guhitana ari 245, abandi 12 baracyarembye cyane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .