Minisiteri y’Ubuzima yatangaje ko abishwe na Coronavirus ari abagabo babiri barimo uw’imyaka 71 w’i Nyamagabe n’undi ufite na 47 ukomoka i Muhanga.

Itangazo rya Minisante rivuga ko kuri uyu wa Gatandatu, tariki ya 20 Gashyantare 2021, abantu 59 banduye COVID-19 mu bipimo 4668; kuri ubu abamaze gusanganwa ubwandu bw’iki cyorezo giterwa na Coronavirus mu Rwanda ni 17 988.

Abarwayi bashya biganje mu Mujyi wa Kigali ahabonetse 22, Kamonyi ni batandatu, Nyamagabe hakuwe batanu, mu gihe mu turere 14 nta murwayi wabonetsemo.

20.02.2021 Amakuru Mashya | Update

Twihanganishije imiryango y’abagabo babiri b’imyaka 71 (i Nyamagabe) na 47 (i Muhanga) bitabye Imana / Condolences to families of 71 (in Nyamagabe) and 47 (in Muhanga) yo men who passed away pic.twitter.com/5l5jZe3fx2

— Ministry of Health | Rwanda (@RwandaHealth) February 20, 2021

Kuva COVID-19 iterwa n’agakoko ka Coronavirus igaragaye mu Rwanda hamaze gufatwa ibipimo 973 922, byasanzwemo 17 988 bamaze kwandura; 16 597 barakize. Abagera ku 1144 ni bo bari gukurikiranirwa mu ngo zabo mu gihe abandi bari kwitabwaho kwa muganga. Abantu bamaze guhitanwa n’iki cyorezo ni 247.

Minisiteri y’Ubuzima yerekana ko ijanisha ku bandura Coronavirus riri kuri 1.3%, iry’abakira ni 92.2% mu gihe abapfa bari kuri 1.3%.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.