Barindwi banduye Coronavirus mu Rwanda

Yanditswe na Ishimwe Israel
Kuya 12 Ugushyingo 2020 saa 08:06
Yasuwe :
0 0

Abantu barindwi basanzwemo COVID-19 mu bipimo 1917 byafashwe mu masaha 24 yashize mu gihe nta murwayi wakize iyi ndwara mu Rwanda.

Minisiteri y’Ubuzima yatangaje ko abarwayi bashya bagaragaye mu duce dutandukanye aho bane bakuwe mu Mujyi wa Kigali, mu Karere ka Nyagatare habonetse umwe mu gihe i Rubavu hagaragaye babiri.

Mu gihe umubare w’abandura ukomeje kwiyongera, kuri uyu wa 12 Ugushyingo 2020, Minisante yatangaje ko nta murwayi wakize mu bakiri kwitabwaho.

Tariki 14 Werurwe 2020 nibwo Minisiteri y’Ubuzima yemeje ko Umuhinde wageze mu gihugu ku wa 8 Werurwe 2020 avuye i Mumbai, yasanganywe icyorezo cya COVID-19 giterwa n’agakoko gashya ka Coronavirus.

Kuva COVID-19 igaragaye mu Rwanda, hamaze kuboneka abantu 5319 bayanduye mu bipimo 579 653 bimaze gufatwa. Muri bo 4974 barasezerewe nyuma yo gupimwa bagasangwa nta bwandu bwayo bukiri mu maraso yabo mu gihe 304 bakirwaye. Abantu 41 nibo bamaze guhitanwa n’iki cyorezo.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 52 852 624 bamaze kuyandura ku Isi yose, barimo 1 294 997 yahitanye mu gihe 36 879 822 bamaze kuyikira.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .