00:00:00 IGIHE NETWORK KN KINYARWANDA EN ENGLISH FR FRANCAIS

U Bushinwa bwemereye u Rwanda dose miliyoni 4 z’inkingo za COVID-19

Yanditswe na IGIHE
Kuya 13 Mutarama 2022 saa 10:20
Yasuwe :

Ambasade y’u Bushinwa yatangaje ko umwaka wa 2022 uzarangira iki gihugu gihaye u Rwanda dose miliyoni enye z’inkingo zizifashishwa mu gukingira abaturage icyorezo cya COVID-19 hirya no hino mu gihugu.

Ku wa Kabiri, tariki 11 Mutarama 2022, ni bwo hasohotse itangazo rivuga ko Ambasaderi w’u Bushinwa mu Rwanda, Rao Hongwei yagiranye ibiganiro na Minisitiri w’Ububanyi n’Amahanga, Dr Vincent Biruta. Muri ibi biganiro ni bwo yamumenyesheje ko igihugu cye cyemeye guha u Rwanda dose miliyoni enye z’inkingo za COVID-19.

Ambasaderi Rao yavuze ko igihugu cye cyiyemeje gufatanya n’ibihugu bikiri mu nzira y’amajyambere mu rugamba rwo kurwanya COVID-19.

Ati “Kuva icyorezo cya COVID-19 cyagaragara, u Bushinwa bwakomeje guteza imbere ubufatanye mpuzamahanga hagamijwe kurwanya iki cyorezo no gufasha ibihugu biri mu nzira y’amajyambere nk’u Rwanda kubona inkingo za COVID-19.”

Yakomeje avuga ko izi nkingo u Rwanda ruzahabwa ziri muri dose miliyari imwe Perezida w’u Bushinwa, Xi Jinping, yemereye ibihugu bya Afurika.

Ati “Mu gihe Omicron ikomeje gukwirakwira hirya no hino ku Isi mu buryo bwihuse, u Bushinwa bukomeje gushyira mu bikorwa ukwiyemeza kwa Perezida Xi ndetse bwafashe umwanzuro wo guha u Rwanda izindi dose miliyoni enye z’inkingo za COVID-19 mu rwego rwo kurufasha kwihutisha gahunda y’igihugu y’ikingira no kurinda ubuzima bw’abaturage.”

Minisitiri Dr Vincent Biruta yashimiye u Bushinwa ku bw’iyi nkunga y’inkingo, avuga ko ubufasha bwabwo ari bwo bwatumye u Rwanda rwesa uduhigo mu bijyanye no gukingira COVID-19, twashyizweho n’Ishami ry’Umuryango w’Abibumbye ryita ku Buzima, OMS.

Yakomeje avuga ko izi nkingo u Rwanda rwemerewe zizatuma rugera ku ntego yo gukingira 70% by’abaturage barwo mbere y’uko umwaka wa 2022 ugeramo hagati.

Kugeza ubu mu Rwanda abarenga miliyoni eshanu bamaze guhabwa dose ebyiri z’inkingo za COVID-19, mu gihe abarenga miliyoni zirindwi bo bahawe iya mbere. Kuva gahunda yo gutangira dose ya gatatu yatangira abarenga ibihumbi 400 na bo gufata urwo rukingo rushimangira.

Ambasaderi w’u Bushinwa mu Rwanda, Rao Hongwei yamenyesheje Minisitiri w'Ububanyi n'Amahanga, Dr Vincent Biruta ko igihugu cye cyemeye guha u Rwanda doze miliyoni enye z'inkingo za COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .