Umubare w’abahitanywe na Coronavirus muri USA umaze kurenga ¼ cya miliyoni

Yanditswe na Uwimana Abraham
Kuya 19 Ugushyingo 2020 saa 09:40
Yasuwe :
0 0

Umubare w’abahitanwa na Covid-19 muri Leta Zunze Ubumwe za Amerika ukomeje kwiyongera cyane bidasanzwe, kuri ubu imibare iheruka igaragaza ko abamaze guhitanwa n’iki cyorezo barenga 250.000 mu mezi icumi kimaze, ni umubare ukubye inshuro 10 uw’abahitanwa n’impanuka z’imodoka mu mwaka wose.

Mu byumweru bine bishize abahitanwa na Covid-19 biyongereyeho 42%, kuko abahitanwaga nayo mu ntangiriro za Ukwakira bari ku mpuzandengo ya 821 ku munsi, mu gihe impuzandengo yo mu cyumweru gishize yari abantu 1167 ku munsi.

Uko umubare w’abahitanwa na Covid-19 ukomeje kwiyongera muri Amerika ni ko n’umubare w’abandura muri rusange ukomeje gutumbagira kuko kuri ubu USA niyo iza imbere ku Isi mu kugira abanduye benshi, kuri ubu handuye ababarirwa muri miliyoni 11,4.

Ni mu gihe inkingo ebyiri byavuzwe ko zitanga icyizere, zitarageza ku cyiciro cyo gutangwa, kandi Coronavirus yo ikaba igaragaza kurushaho gukaza umurego muri icyo gihugu.

Uyu mubare w’abamaze guhitanwa na Covid-19 muri Leta Zunze Ubumwe za Amerika, ukubye inshuro nyinshi imibare y’abahitanwa n’ibindi bizazane bikunze guhitana abantu benshi mu mwaka, harimo impanuka z’imodoka, kwiyahura no guturika kw’imitsi yo mu bwonko.

Nk’ubu mu mezi 10 Covid-19 imaze muri USA, imaze guhitana abantu 250.000, kimwe cya kane cya miliyoni, mu gihe abahitanwa n’impanuka z’imodoka mu gihe cy’umwaka ari 24.166, abahitanwa no kwiyahura ni 45.439, guturika kw’imitsi byo ni 141.952.

Ni imibare kandi yenda kwegera abahitanwa n’indwara z’umutima bangana na 670.595, abahitanwa na cancer bangana 612.725, byose mu gihe cy’umwaka, mu gihe Coronavirus yo imaze amezi 10 gusa.

Umuyobozi mu Biro bya Trump ushinzwe gukurikirana ibyo gupima Covid-19 yavuze ko bageramiwe, bakaba basabwa gufata ingamba zidasanzwe.

Yagize ati “Kuri ubu, turi mu bihe bigoye, ntitugomba guterera iyo. Ubu nibwo bwiyongere bw’ubwandu buri hejuru tugize kuva icyorezo cyaza muri USA, kandi nta kimenyetso cyo gucusha macye kigaragara.”

Ubu bwiyongere bw’ubwandu muri leta zose zigize USA, bwatumye amavuriro n’ibitaro byakira abarwayi benshi kuburyo kuri ubu bari kurenga ubushobozi bwabyo.

Umuyobozi mu ivuriro rya Integris muri Oklahoma, Dr Julie Watson, yaragize ati “Ndatekereza ko turi gusatira kurengwa n’ibintu, nicyo gihe ngo abaturage bacu batagire kudufasha Bambara udupfukamunwa banahana intera.”

Raporo y’ab’imbere mu ikipe ya White House ishinzwe guhashya Coronavirus, ifitiwe kopi na NBC News, igaragaza ko hakomeje kuba ubwiyongere bw’ubwandu buri gukwirakwira mu bice byose by’igihugu, kandi hakaba nta n’ikimenyetso cy’uko byagabanuka.

Iyi kipe kandi yagaragaje impungenge ko imbaraga ziri gushyirwa mu guhangana n’icyorezo zidahagije, zikaba zikwiye kwiyongera cyane cyane mu bihe by’iminsi mikuru byegereje.

Ubwo butumwa bwatewe utwatsi n’Umujyanama Mukuru wa Trump ku bigendanye n’iki cyorezo, Dr Scott Atlas, wumvikanye mu kiganiro ashishikariza abantu kuzagira amahuriro manini mu bihe by’iminsi mikuru, bakima amatwi ibivugwa ngo impfu ziterwa na Covid-19 ziri kwiyongera.

Uyu Atlas yagiye ashinjwa gukwirakwiza amakuru atariyo ayobya abaturage ku biendanye na Coronavirus, akavuga ko kwamabara agapfukamunwa ntacyo bimaze bitarinda ikwirakwira ry’icyorezo.

Ni mu gihe impuguke mpuzamahanga mu by’ubuzima zigaragaza ko kwambara agapfukamunwa bitanga amahirwe menshi yo kwirinda kwanduzanya.

Umubare w’abahitanywe na Coronavirus muri USA umaze kurenga ¼ cya miliyoni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .