Ibitabo umunani byahindura imitekerereze yawe, imibereho n’uburyo ukoramo akazi kawe

Yanditswe na Uwimana Abraham
Kuya 13 Ukwakira 2020 saa 10:30
Yasuwe :
0 0

Byakunze kuvugwa ko Abanyafurika muri rusange tutagira umuco wo gusoma, kandi mu bitabo hahishwe ubutunzi bwinshi. Gusa n’abagerageza kugira umuco wo gusoma, usanga bigoranye kumenya ibitabo byiza bahitamo byababera ingirakamaro mu buzima bwabo bwa buri munsi.

Ku isi mu masomero atandukanye yaba asanzwe afatika cyangwa ayo kuri murandasi, harimo ibitabo byinshi byanditswe n’abahanga kandi byagira icyo bifasha umuntu.

Ikinyamakuru CNBC cyakusanyije ibitabo umunani byabaye ingenzi kuri benshi, nta gushidikanya nawe uhisemo kubisoma ntiwazabyicuza.

1. “The Joy of Movement: How Exercise Help Us Find Happiness, Hope, Connection and Courage”

Iki gitabo cyanditswe na Kelly McGonigal, agaragazamo uburyo imyitozo ngororamubiri izana ibyishimo mu buzima kuruta ibyazanwa n’ubutunzi cyangwa icyubahiro.

McGonigal usanzwe ari umwarimu muri Kaminuza ya Stanford akaba n’impuguke mu mitekerereze ya muntu, yerekana akoresheje siyansi ndetse n’inkuru ye ubwe, uko imyitozo ari umuti ukomeye w’agahinda gakabije, ubwihebe ndetse no kwigunga.

2. “Altered Traits: Science Reveals How Meditation Changes Your Mind, Brain and Body”

Iki gitabo cyanditswe na Daniel Goleman afatanyije na Richard Davidson, ni igitabo cyuzuyemo ubushakashatsi bwerekana uburyo “meditation” cyangwa umwanya wo kwitekerezaho no kwisubiramo, iyo ikozwe igihe kinini ishobora kutwongerera kwihangana, kugira impuhwe ndetse n’ubushobozi bwo kwita ku byo uri gukora.

3. “Deep Work: Rules for Focused Success in a Distracted World”

Ni igitabo cyanditswe na Cal Newport umwarimu wa mudasobwa muri Kaminuza ya Georgetown, atanga inama z’uburyo wakuraho ibirangaza byakuzira mu gihe uri gukora akazi, hari igihe umuntu aba ari gukorera akazi kuri mudasobwa hakazi ibirangaza bituma ahindura ibyo yakoraga atabirangije bigatuma umusaruro ugabanuka.

Muri iki gitabo Newport atanga inama zizewe z’uburyo wakwirinda burundu ibyo birangaza, ukita ku kazi kandi ugatanga umusaruro ukwiriye.

4. “Biased: Uncovering the Hidden Prejudice That Shapes What We See, Think and Do”

Iki ni igitabo cyanditswe na Jennifer Eberhardt, umwarimu w’ibigendanye n’imitekerereze ya muntu muri Kaminuza ya Stanford, yifashishije ubushakashatsi yerekana ibigendanye n’ivangura rishingiye ku ruhu, aho rikomoka ndetse n’uburyo rigira ingaruka ku mitekerereze yacu, yerekana n’uburyo umuntu yarirwanya bishingiye mu nzego zose.

5. “Maybe You Should Talk to Someone: A Therapist, Her Therapist, and Our Lives Revealed”

Cyanditswe na Lori Gottlieb, yifashishije ubunararibinye afite mu byo kugira inama abantu bafite ibibazo bitandukanye bigira ingaruka ku buzima bwabo bwo mu mutwe. Yanashingiye ku buzima yanyuzemo ubwe, muri iki gitabo yerekana uburyo ubu bujyanama ari ingenzi cyane kuruta uko abantu babitekereza.

6. “Savage Park: A Meditation on Play, Space, and Risk for Americans Who Are Nervous, Distracted and Afraid to Die”

Iki gitabo cyanditswe na Amy Fusselman, ashingiye ku mukino bakiniwe ubwo we n’umuryango we basuraga umujyi wa Tokyo mu Buyapani. Ni igitabo gifasha ababyeyi n’abana muri rusange mu mibanire yabo ya buri munsi.

7. “Mating in Captivity”

Iki gitabo cyanditswe na Esther Perel, kigendanye n’imibanire y’abashakanye cyangwa abari mu rukundo. Muri cyo yerekana uburyo kongera irari no kwishimirana mu mubano wanyu bishobora kongera urukundo. Ikindi ngo ni ukutitega ibidashoboka mu buzima.

8. “Thinking, Fast and Slow”

Iki cyanditswe na Daniel Kaheman, umwarimu w’iby’imitekerereze ya muntu muri Kaminuza ya Princeton, yamenyekanye cyane ku bw’ubushakashatsi yakoze ku buryo bwo gufata ibyemezo akanerekana igihe tudakwiye kwizera ibyiyumviro byacu.

Muri iki gitabo avugamo uburyo dukwiye gushyira ku munzani uburyo bubiri bw’imitekerereze kugira ngo twirinde kwisanga mu bibazo. Uburyo bumwe ni ubwihuse kandi bwuzuyemo amaragamutima, ubundi ni ubushyize mu gaciro kandi bwumvikana.

Gusoma ibitabo ni kimwe mu byungura ababikora ubumenyi kandi bikaba n'isoko yo kuruhuka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .